Stangveiði skilar þremur milljörðum í Borgarbyggð

Byggðaráð Borgarbyggðar hyggst láta kanna umfang og samfélagsleg áhrif stangveiða í sveitarfélaginu. Efnahagslegt virði laxveiðanna í Borgarbyggð; bein, óbein og afleidd áhrif, eru áætluð 3,2 milljarðar króna.

Að því er segir í fundargerð byggðaráðs kemur fram í lokaverkefni Önnu Steinsen til BS gráðu í viðskiptafræði frá 2011 að laxveiði í Borgarbyggð sé að meðaltali rúmlega fjórðungur af heildar laxveiði af náttúrulegum stofnun á Íslandi sé miðað við árin 1974-2009. Fjórar af tíu fengsælustu laxveiðiám á Íslandi séu í sveitarfélaginu.

Eignarhald á veiðijörðum í Borgarbyggð hefur jafnt og þétt færst í hendur annarra en heimamanna.

"Árið 2009 eru 41prósent af veiðijörðum í Borgarbyggð í eigu aðila með lögheimili utan sveitarfélagsins en árið 1990 var það hlutfall 27 prósent. Efnahagslegt virði laxveiðanna í Borgarbyggð, bein, óbein og afleidd áhrif, eru áætluð 3,2 milljarðar króna," segir í fundargerðinni.

Byggðaráðið ætlar að óska eftir að Samtök sveitarfélaga á Vesturlandi láti vinna úttektina á áhrifum stangaveiðanna í héraðinu.

Markmiðin með úttektinni eru:

a) að kanna vannýtt sóknarfæri í tengslum við stangveiði, s.s. þjónustu við veiðimenn.

b) að kanna hversu stór hluti starfa í beinum tengslum við stangveiði er unnin af heimamönnum og sömuleiðis hversu stór hluti af aðföngum og þjónustu er keyptur innan héraðs.

c) að kanna möguleika á að efla hlut sveitarfélagsins og íbúa þess í auðlindinni, s.s. með aukinni atvinnuþátttöku, verslun og þjónustu.

d) vekja athygli á því hversu umfangsmikil auðlind stangveiðin er í héraðinu.