Sara skoraði í sigurleik og Malmö áfram í toppsætinu

Sara Björk Gunnarsdóttir skoraði annað marka LdB Malmö sem lagði Linköping í 10. umferð efstu deildar sænsku knattspyrnunnar í kvöld.

Linköping komst yfir strax á 7. mínútu leiksins en íslenska landsliðskonan jafnaði metin tveimur mínútum síðar. Leikar stóðu jafnir þar til á 54. mínútu þegar kantmaðurinn Ramona Bachmann skoraði sigurmark heimakvenna.

Þóra Björg Helgadóttir stóð vaktina í marki Malmö og hafði nóg að gera ef marka má tölfræðina úr leiknum. Leikmenn Linköping hittu sjö sinum á markið en Þóra bjargaði í öll skiptin nema eitt.

Malmö deilir toppsæti deildarinnar með Tyresö að loknum tíu umferðum. Bæði lið hafa 24 stig en Tyresö hefur þó betri markatölu sem nemur fimm mörkum.