Hlutabréf í Högum lækkuðu vegna frétta af Jóhannesi

Hlutabréf í Högum lækkuðu um tæplega þrjú prósent í dag, meðal annars vegna tíðinda um að Jóhannes Jónsson ætli að opna lágvöruverslanir hér á landi í samstarfi við Malcom Walker, forstjóra Iceland Foods í Bretlandi, sem á og rekur um 800 verslanir. Verslað hefur verið með hlutabréf í Högum fyrir tæplega 200 milljónir í Kauphöllinni í dag.

Ingólfur Bender, forstjóri greiningadeildar Íslandsbanka, segir að lækkunin sé líklega tilkomin af tveimur ástæðum. Annars vegar vegna tíðinda af áformum Jóhannesar, og svo að einhverjir fjárfestar hafa ekki verið ánægðir með ársuppgjör Haga, sem var birt í dag.

„Fyrir birtingu kom lækkun," segir Ingólfur og á þá við birtingu uppgjörsins. Hann telur það skýrt merki um að lækkun á hlutabréfum á Högum, hafi verið til komin vegna frétta Viðskiptablaðsins um að Jóhannes boði endurkomu á lágvöruverslunarmarkaði.

Ingólfur segir að hlutabréf Haga hafi svo lækkað ennfrekar eftir að ársreikningurinn var birtur í morgun. Þar kom fram að hagnaður Haga á síðasta rekstrarári nam 2,3 milljörðum króna eða 3,4% af veltu.

„Það bendir til þess að fjárfestar hafi haft meiri væntingar til uppgjörsins," segir Ingólfur sem bætir við að spá Íslandsbanka hafi þó rímað við niðurstöður ársuppgjörsins.

Finnur Árnason sagði í viðtali við Vísi fyrr í dag að hann hefði engar sérstakar áhyggjur af innreið Jóhannesar og Malcoms inn á íslenskan lágvörumarkað. „Við erum með besta liðið," bætti hann svo við.

Jóhannes sagði í samtali við Vísi að hann stefndi á að opna fyrstu verslunina síðla sumars.