Fyrstu verslanirnar munu opna síðsumars

„Nei, það er bjartsýni að við opnum 17. júní, það verður síðsumars sem við opnum verslanirnar," segir Jóhannes Jónsson, sem hyggst opna lágvöruverslanir hér á landi í anda Bónus verslananna sem hann átti áður ásamt syni sínum, Jóni Ásgeiri, en Viðskiptablaðið greindi frá því fyrsta verslunin myndi opna á þjóðhátíðardaginn.

Jón Ásgeir verður þó fjarri öllu gamni í þetta skiptið, þegar Jóhannes er spurður hvort sonur hans muni aðstoða föður sinn við reksturinn svarar Jóhannes: „Neinei, hann hefur engan áhuga á þessu. Hann er bara að reyna að skapa sér eigin vinnu."

Jóhannes hyggst opna lágvöruverslanir um allt land. Það er allavega framtíðaráætlunin. Það er Malcom Walker sem á fyrirtækið með Jóhannesi, en sá er vægast sagt reyndur í lágvöruverslunarbransanum, en hann á og rekur Iceland matvörukeðjuna í Bretlandi, sem telur um 800 verslanir.

Jóhannes segir Malcom ekki skipta sér beint af rekstri félagsins sem mun reka verslanirnar hér á landi, „ætli hann eigi ekki nóg með sínar átta hundruð verslanir," bætir Jóhannes við.

Jóhannes og Malcom eru þó ekki ókunnugir, enda átti Jón Ásgeir Iceland á sínum tíma, og fékk þá Malcom til þess að reka fyrirtækið og snúa rekstri þess í hagnað á sínum tíma. Það tókst vel og úr varð að Iceland keðjan reyndist dýrmætasta eign hinna föllnu útrásavíkinga.

Og þegar Jóhannes er spurður hvort hrunið skaði hann, og hafi með einhverjum hætti áhrif á fyrirhugaðan verslunarrekstur, svarar Jóhannes: „Ég hef aldrei fundið fyrir óvild í minn garð, allavega eins og fólk talar við mig."

Hann segir störf sín í gegnum tíðina dæma sig sjálf. Hann stofnaði Bónus á sínum tíma og byggði upp eigið veldi, sem hann svo missti í hruninu. Í dag eru það lífeyrissjóðir, fjárfestingasjóðir og einstakir fjárfestar sem eiga Haga. Jóhannes telur það ekki fara saman að reka lífeyrissjóð og eiga hlut í lágvöruverslun.

„Ég bara skil ekki konseptið sem lífeyrissjóðirnir eru að koma sér upp. Þeir sækja í raun ávinning í vasa þeirra sem eiga sjóðina," útskýrir Jóhannes.

Eins og þekkt er veiktist Jóhannes af krabbameini eftir hrunið. Hann missti því ekki aðeins bróðurhluta eigna sinna, hann missti heilsuna einnig. Spurður hvort hann sé orðinn heilsuhraustur og tilbúinn í samkeppni á lágvörumarkaði, svarar Jóhannes:

„Ég er útskrifaður af þessum veikindum, þó maður viti svo sem aldrei. Og ég er sannarlega tilbúinn, enda ekki nema 72 ára gamall. Ég á góð 30 ár eftir. Guðlaugur [Pálsson, verslunareigandi] á Eyrabakka var 97 ára þegar hann hætti, þannig það er nóg eftir."