Kynferðislegum myndum af íslenskum stúlkum dreift á netinu

Kynferðislegar myndir af íslenskum stúlkum, sem margar hverjar eru undir lögaldri, voru settar inn á íslenska deiliskrárvefinn Deildu.net í gær.Stjórendur síðunnar fjárlægðu efnið af vefnum og var aðgangur þess sem sendi efnið inn gerður óvirkur.

Í bréfi sem stjórnendur vefsins skrifuðu notendum segir að stranglega bannað sé að senda inn svona myndir en þetta er ekki í fyrsta skiptið sem það gerist. Eftir að myndirnar komu inn á vefinn höfðu nokkrir kærastar stúlknanna og einn faðir samband við stjórnendur vefsins og báðu um að fjarlægja myndirnar.

Bréfið til notenda Deildu.net má sjá hér að neðan:

Gott kvöld, notendur Deildu.net!

Núna í dag var sent inn torrent sem innihélt kynferðislegar myndir af Íslenskum stúlkum sem voru, margar hverjar undir lögaldri. Torrentið var fjarlægt af vefnum og aðgangur innsendanda var gerður óvirkur.

Þetta er ekki í fyrsta skiptið sem þetta torrent kemur inn á þennan vef, og ég vil ítreka það við notendur að þetta er STRANGLEGA BANNAÐ, og við svona brotum höfum við ENGA þolinmæði. Við svona broti er TAFARLAUST bannað innsendanda

Það má ekki gleyma því að stelpurnar á myndunum eru manneskjur líka - alveg eins og ég og þú. Þær eiga foreldra, systkini, kærasta og þurfa - alveg eins og þú að halda uppi orðspori. Nokkrir kærastar og einn pabbi höfðu samband við mig á þeim stutta tíma sem þessi skrá var hér inni, og báðu mig vinsamlegast um að fjarlægja þetta.

Og enn og aftur, þessu tökum við gífurlega alvarlega og við þessu verður ENGIN þolinmæði sýnd.

Kveðjur,

Stjórnin.