Schumacher segist ekki geta sýnt hvað í honum býr

Michael Schumacher hjá Mercedes liðinu segist ekki geta ekið bíl sínum og fengið allt úr honum sem hann hefur að bjóða vegna þess að hann þurfi alltaf að passa upp á að slíta dekkjunum ekki of hratt.

"Það sem ég er aðallega óánægður með er hvernig allir eru að aka vel innan þeirra takmarkana sem bílarnir - og ökumennirnir - hafa vegna þess að þeir þurfa að hugsa um dekkin allan tímann," sagði heimsmeistarinn sjöfaldi við BBC í gær.

"Ég set spurningamerki við það hvort dekkin þurfi að spila svo stóra rullu og hvort þau eigi ekki að endast aðeins lengur svo maður geti ekið á venjulegum keppnishraða. Við erum bara á rúntinum eins og öryggisbíllinn sé alltaf á brautinni."

"Ég er bara ekki ánægður með þessa stöðu. Ef það væri bara einn bíll með þetta vandamál væri þetta ekki mikið mál. En af því að flestir þurfa að huga að þessu finnst mér þetta ekki rétt nálgun á dekkin," sagði Schumacher.

Paul Hembrey, yfirmaður mótorsportdeildar Pirelli, sagðist vera hissa á þessari gagnrýni Schumachers, sérstaklega því heimsmeistarinn var mjög ánægður með dekkin á undirbúningstímabilinu.

Mercedes-bíllinn fór mjög illa með dekkin í fyrstu tveimur kappökstrum tímabilsins en liðið hélt að vandamálið væri úr sögunni eftir kínverska kappaksturinn. Í Barein spilaði hitastigið gríðarlegan þátt í dekkjaslitinu og vandamál Mercedes-liðsins fóru að gera vart við sig á ný.