Ross Brawn: Hin liðin fara frjálslega með reglur

Ross Brawn liðstjóri Mercedes liðsins í Formúlu 1 segir keppinautana fara frjálslega með nýjar reglur um útblásturop á bílunum. Mercedes liðið er sjálft sagt túlka reglurnar frjálslega.

Brawn bendir á að nýjar reglur um útblástursop bílanna megi ekki vísa að afturvængnum og hafa áhrif á loftflæði bílanna. Sum liðin hafa hins vegar endurhannað allan afturenda bíla sinna til þess að takmarka áhrif þessara nýju reglna.

Mercedes liðið er sagt hafa hannað og smíðað loftop á afturvæng sínum sem opnast þegar ökumenn geta notað DRS-kerfið. Christian Horner liðstjóri Red Bull var afar ósáttur um síðast liðna helgi þegar Mercedes liðinu var leyft að tefla fram slíkum búnaði.

"Öll þau ár sem ég hef verið í Formúlu 1 hefur verið einhverskonar rifrildi út af reglunum," sagði Brawn um umræðuna sem skapaðist um helgina. "Í raun höfum við aðeins tekið sviðsljósið af afar vafasömum útblásturskerfum annarra liða."

"FIA hefur örugglega sagt ykkur að við ætluðum ekki að vera með pústblásna loftdreifa í sumar, sum liðin hafa þó smíðað þannig."

Ross Brawn segist ekki ætla að kvarta til FIA vegna þessara vafasömu útblásturskerfa, eins og hin liðin hafa kvartað yfir afturvæng Mercedes.