Allir með áfengismæli í bílnum

Frönsk stjórnvöld hafa samþykkt lög þess efnis að öndunarmælir sem mælir áfengismagn í blóði ökumanna skuli vera í öllum vélknúnum ökutækjum, sem eru í umferð þar í landi frá og með 1. júlí næstkomandi. Bæði í bílum og bifhjólum.

Yfirvöld vilja tryggja að allir ökumenn viti hversu mikið áfengi er í blóði þeirra áður en þeir taka ákvörðun að aka af stað. Þetta á einnig við um ökutæki sem koma erlendis frá og verða mælar seldir við landamæri.

Hrina alvarlegra umferðarslysa og þar á meðal banaslysa, sem má meðal annars rekja til ölvunaraksturs, hefur hvatt stjórnvöld til að grípa til þessara aðgerða.

Stjórnvöld telja að lögin leiði til þess að menn hugsi sig tvisvar um áður en þeir aka undir áhrifum áfengis á vegum landsins.