Segir stöðu Íslands frábrugðna stöðunni í öðrum Evrópuríkjum

Efnahags- og viðskiptaráðherra segir ríkissjóð spara milljarða í vaxtakostnað með því að hefja endurgreiðslur lána frá Alþjóðagjaldeyrissjóðnum á undan áætlun. Ísland sé í sérstöðu hvað varðar fjármögnun næstu árin samanborið við önnur Evrópuríki.

Ríkissjóður Íslands og Seðlabankinn munu í þessum mánuði endurgreiða hundrað og sextán milljarða króna til Alþjóðagjaldeyrissjóðsins og Norðurlandanna vegna efnahagsáætlunar AGS og stjórnvalda. Síðasta greiðsla þessarra lána frá Norðurlöndunum kom inn núna um áramótin en markmiðið með endurgreiðslunni er að minnka kostnað við gjaldeyrisforðahald.

„Kosturinn við þetta er að þá lengist í raun og veru í lánasafninu en um leið spörum við mikla vexti með að flýta fyrir okkur varðandi þessa gjalddaga," sagði Steingrímur J. Sigfússon, efnahags- og viðskiptaráðherra.

Þar með hefur ríkissjóður endurgreitt fimmtung þeirra lána sem tekin voru en Steingrímur segir þetta ekki hafa nein áhrif á greiðslugetu ríkissjóðs í framtíðinni heldur sé þetta fyrst og fremst skuldastýring og sparnaður.

„Þetta eru milljarðar á ári sem að svona stór forði tekur til sín og bara þessi ádráttur fyrir áramótin gat verið kostnaður upp á 3-4 milljarða eða svo í vaxtamun, og við viljum losna við sem mest af þeim mun og það vinnst með þessu," sagði Steingrímur.

Hann segir endurgreiðsluferil lánanna frá Norðurlöndunum vera mun lengri en lánum frá AGS og þar með sé gjaldeyrisforðinn vel fjármagnaður fram á næsta áratug.

„Að þessu leyti er Ísland í verulega frábrugðinni stöðu borið saman við mörg önnur ríki í Evrópu að við erum vel fjármögnuð til næstu ára hvað þetta varðar og getum þar af leiðandi farið í þessa fyrirframgreiðslu núna," sagði Steingrímur.