Sex ömmur keppa fyrir Rússland í Eurovision

Framlag Rússlands til söngvakeppninnar Eurovision í ár verða sex ömmur sem allar eru komnar vel á sjötugsaldurinn.

Ömmur þessar koma frá litlu þorpi í Udmurt lýðveldinu og kalla sig Buranovo ömmurnar, eða Buranovskiye Babuskhi til heiðurs þorpinu sínu en þarna um slóðir er talað mál sem líkist helst finnsku.

Í undakeppninni í Moskvu sigruðu þessar ömmur 24 aðra flytjendur þar á meðal dúett þar sem Yulia Volkova úr Tatu var önnur söngkonan.

Talsmaður þessa hóps af ömmum kallast Olga amma og hún segir að þær skvísurnar séu ekki í leit að frægð og frama. Ömmur hafi ekki þörf fyrir slíka hluti. Ef þeim tekst að öngla saman nokkrum rúblum með þátttökunni í Eurovision muni það fé allt fara til að byggja kirkju í þorpinu þeirra.

Gárungarnir segja að þarna séu Rússar að skjóta Englendingum ref fyrir rass en eins og kunnugt er mun hinn 75 ára gamli öldungur, Engilbert Humperdink, verða framlag Englendinga í Eurovision í ár.