Anton og Hlynur dæma mikilvægan leik í A-riðli

Danskir dómarar dæmdu leik Íslands í gær og í kvöld munu íslensku dómararnir Anton Gylfi Pálsson og Hlynur Leifsson dæma leik Danmerkur og Póllands á EM í Serbíu.

Um gríðarlega mikilvægan leik er að ræða og úrslitaleik um hvort liðið tekur með sér tvö stig áfram í milliriðlakeppnina. Serbar eru í efsta sæti A-riðils með fjögur stig og öruggir með að fara áfram með öll fjögur stigin með sér. Þeir mæta Slóvökum í kvöld í leik sem skiptir í raun engu máli því Slóvakía á ekki lengur möguleika á að komast áfram.

Danir og Pólverjar eru bæði með tvö stig og þurfa að vinna í kvöld til að eiga raunhæfan möguleika á að komast í undanúrslit keppninar.

Anton og Hlynur dæmdu leik Þýskalands og Makedóníu á þriðjudagskvöldið og var sá leikur í járnum alveg fram á síðustu stundu. Svo fór að Þjóðverjar unnu, 24-23, en Makedóníumenn áttu skot í slá á lokasekúndum og vildu meina að boltinn hafi farið inn fyrir marklínuna þegar hann skoppaði af gólfinu og út.

Forsvarsmenn makedónska liðsins voru afar ósáttir og kvörtuðu undan ákvörðun íslensku dómaranna að dæma ekki mark til EHF - sem vísaði málinu frá og staðfesti úrslitin.

Það er því ljóst að þeir félagar fá að dæma sinn annan mikilvæga leik í röð sem verður að teljast mikil viðurkenning fyrir þá.