Afsakiði meðan ég æli

Þegar Jón Ásgeir Jóhannesson var sakfelldur fyrir örlítið brot af sakargiftum í margfrægu Baugsmáli á sínum tíma var mikið gert úr því í Morgunblaðinu – og víðar – að 3 mánaða skilorðsbundin refsing væri stórkostlegt áfall og að afbrotamaðurinn mætti ekki sitja í stjórn eða vera framkvæmdastjóri hlutafélags næstu þrjú árin.

Hinn 10. júní sl. var annar maður, Ingvi Hrafn Jónsson, eigandi sjónvarpsstöðvarinnar ÍNN, sakfelldur fyrir alvarleg skattalaga- og hegningarlagabrot og dæmdur í 3 mánaða fangelsi skilorðsbundið og að auki til að greiða 8 milljónir króna í sekt til ríkissjóðs og skyldi 4 mánaða fangelsi koma í stað sektarinnar yrði hún ekki greidd. Þeim dómi var ekki áfrýjað.

Þrátt fyrir þennan dóm yfir eiganda sjónvarpsstöðvarinnar er vandlætingarmeistarinn Björn Bjarnason, fyrrverandi dómsmálaráðherra til margra ára, fastur þáttastjórnandi á þessari gagnmerku sjónvarpsstöð. Nýjasti viðmælandi hans í stúdíói stöðvarinnar var annar ekki síðri siðapostuli, Davíð Oddsson, fyrrverandi forsætisráðherra og ýmislegt fleira. Ekki var annað að sjá en að báðir kynnu vel við sig í húsakynnum brotamannsins. Þess vegna kom mér í hug það brot úr alkunnum dægurlagstexta meistara Megasar sem er fyrirsögn greinarkorns þessa.