Tungufljótið að gefa vænan sjóbirting og lax

Veiðivísir heyrði í Bjarna Júlíussyni, formanni SVFR, og leitaði frétta úr Tungufljóti. Þeir sem þar voru við veiðar um helgina segja töluvert líf vera á bökkum árinnar.

"Fyrstu birtingarnir komu á land fyrir miðjan mánuðinn, og við heyrðum af 8 og 12 punda birtingum úr Syðri Hólma. Svo virðist laxinn vera kominn líka, því þar var einn 96 sentímetra tekinn úr Klapparhyl á Nobbler. Það er nokkuð hæfilegt vatn í fljótinu núna segja veiðimenn og eru bjartsýnir á að þar verði líf næstu dagana" segir Bjarni.

Eins eru góðar fréttir úr Hraunsfirði en þar koma góð skot af og til. Um helgina var þar veiðimaður sem tók 4 bleikjur allar yfir 4 pund. "Hann sá lax stökkva örlítið utar, færði sig á punktinn þar sem hann sá hreyfinguna, setti rauðan Francis undir og tók auðvitað laxinn! Svona á að gera þetta," segir Bjarni.

svavar@frettabladid.is