Snjór eða vatn? – Skíðaíþrótt í Bláfjöllum eða ekki?

Í Fréttablaðinu föstudaginn 18. nóvember birtist grein þeirra Margrétar Júlíu Rafnsdóttur, formanns umhverfis- og samgöngunefndar Kópavogs, og Guðnýjar Dóru Gestsdóttur, formanns skipulagsnefndar Kópavogs, undir fyrirsögninni Snjór eða vatn?

Skíðaráð Reykjavíkur vill af þessu tilefni taka undir með greinarhöfundum um mikilvægi vatnsverndar fyrir höfuðborgarsvæðið en jafnframt ítreka að snjór sem kann að verða framleiddur á skíðasvæðinu í Bláfjöllum verður að vatni sem á engan hátt verður frábrugðið því vatni sem til verður úr náttúrulegum snjó er fellur á svæðið í dag.

Skíðaráðið vill benda á að allar fyrirliggjandi upplýsingar sýna fram á að vatnsbólum höfuðborgarsvæðisins stendur ekki nein hætta af snjóframleiðslu á skíðasvæðinu í Bláfjöllum. Í skýrslu verkfræðistofunnar Mannvits sem kynnt hefur verið í haust er einnig sýnt fram á að eini þátturinn sem óvissa ríkir um er hve mikil aukning kann að verða á árlegum fjölda bíla sem flytja skíðafólk á svæðið og hugsanlegri mengun frá þeim bílum.

Um þennan þátt þarf umræðan um umhverfisáhrif snjóframleiðslu í Bláfjöllum að snúast og hugsanlegar mótvægisaðgerðir ef þörf verður talin á þeim, t.d. að hámarka bílafjölda sem inn á svæðið má fara dag hvern.

Bent skal á að sveitarfélög höfuðborgarsvæðisins hafa fjárfest fyrir hundruð milljóna á skíðasvæðinu í Bláfjöllum til þess að íbúar þeirra geti stundað skíðaíþróttina eins og aðrar íþróttir sem mannvirki eru byggð fyrir, en innan þéttbýlisins.

Skíðasvæðið í Bláfjöllum er staðreynd, þar eru íþróttamannvirki sem ber að nýta eins og kostur er íbúum höfuðborgarsvæðisins til heilla og ánægju. Hvort leyfa á aðra starfsemi innan vatnsverndarsvæða höfuðborgarsvæðisins verður að meta í ljósi þeirrar starfsemi sem fyrir er, en sú umræða á ekki að koma í veg fyrir að almenningur höfuðborgarsvæðisins fái að stunda skíðaíþróttina til jafns við aðrar íþróttir.