Næstu vikur ráða úrslitum

Þjóðverjar gerðu í gær lítið úr fregnum þess efnis að samþykkt hefði verið á fundi í Washington um helgina að fjórfalda björgunarsjóð evruríkjanna sautján. Hlutabréfaverð hafði hækkað í allan gærdag vegna frétta þess efnis.

Áfram ríkir því mikil óvissa um efnahagsástandið. Meðal þeirra aðgerða sem rætt var um í gær var að helmingur skulda Grikkja yrði afskrifaður. Vonast er til að ákvörðun verði tekin innan fimm til sex vikna. Meðal embættismanna Evrópusambandsins er þó lögð áhersla á að samkomulag frá því í júlí, sem kveður á um 20 prósenta afskriftir, verði samþykkt í þjóðþingum ríkjanna.

Ástandið nú og árið 2008 er mjög áþekkt, að sögn yfirmanns hjá greiningardeild MF Global. Munurinn sé, að nú séu ríki í hættu en ekki fyrirtæki. Næstu dagar og vikur ráði úrslitum.

Steingrímur J. Sigfússon fjármálaráðherra segir óvissu hafa grúft yfir framvindu alþjóðlegra efnahagsmála. Sjónir manna hafi mest beinst að Evrópu og vandanum sem þar væri við að glíma. Ástandið væri hins vegar einnig tvísýnt í Bandaríkjunum.

„Menn höfðu áhyggjur af efnahag Bandaríkjanna, en ekki síst þráteflinu í stjórnmálum hér. Þessi brjálæðislega þræta í sumar um skuldaþakið skaðaði Bandaríkin og alþjóðlegt efnahagskerfi heilmikið.“

Þrátt fyrir blikur á lofti segir Steingrímur of snemmt að búast við annarri kreppu. Hættan sé, auk málefna Bandaríkjanna, að skuldavandi Grikkja smitist yfir á stærri hagkerfi í Evrópu. „Á hinn bóginn er afkoma atvinnufyrirtækja ágæt. Þó bankar og fjármálafyrirtækin séu í vandræðum og ríkissjóðir skuldugir gera mörg fyrirtæki upp með ágætis hagnaði.“- kóp, - þeb