Leif Magnús flytur til Íslands í sumar
„Þetta eru mjög góð tíðindi. Það er þungu fargi af okkur öllum létt,“ segir Óskar P. Friðriksson, afi hins átta ára gamla Leifs Magnúsar Grétarssonar Thisland. Norskur dómstóll hefur samþykkt að veita Grétari, föður Leifs, fullt forræði yfir honum og er von á Leif til Íslands í byrjun júní þegar skólahaldi lýkur í bænum Mandal í Noregi.
Þar hefur hann búið hjá norskum ættingjum frá því að móðir hans, Heidi Thisland Jensen, var myrt á hrottafengin hátt af kærasta sínum í mars síðastliðnum.
„Ég talaði við Leif í gær og þá lá bara vel á honum, hann hlakkar mikið til að koma til okkar,“ segir Óskar og bætir við:
„Við höfum auðvitað verið í miklu sambandi við hann en við pössum okkur þó að hringja ekki í hann allt of oft heldur. Hann er hjá mjög góðu fólki.“
Óskar á ekki von á því að það reynist Leif erfitt að aðlagast lífi á Íslandi. Hann hefur haft annan fótinn hér á landi undanfarin ár og bjó meðal annars hér frá júní 2008 til ágúst 2010. Íslensk fjölskylda Leifs býr í Vestmannaeyjum og þar gekk hann um tíma í skóla.
„Það er hins vegar skylda okkar núna að sjá til þess að hann fái áfram að umgangast og vera með sínum ættingjum í Noregi. Amma hans talar til dæmis enga íslensku og þess vegna höfum við ráðið manneskju til að kenna honum og halda við norskunni,“ segir Óskar og bætir við:
„Núna horfum við bara björtum augum á framtíðina og vonandi gróa sárin með tímanum. Þetta var náttúrlega gríðarleg áfall. Fyrir utan það að missa Heidi stóðum við allt í einu frammi fyrir því að þurfa að sanna okkur fyrir ættingjum hennar úti. En með góðra manna hjálp og mörgum bænum hefur þetta farið svona.“
Grétar, sonur Óskars, kynntist Heidi þegar hún dvaldist á sveitabæ hér á landi árið 2002. Þau felldu hugi saman og eignuðust Leif Magnús í janúar 2003. Heidi fluttist aftur til Noregs með drenginn en þau komu reglulega í langar heimsóknir til Íslands.
Heidi fannst látin af völdum stungusára fyrir utan heimili sitt í Mandal hinn 20. mars síðastliðinn. Nokkrum klukkustundum síðar var kærasti hennar handtekinn en hann hefur síðan játað á sig morðið.
Tengdar fréttir
Morðingi Heidi fékk fimmtán ár í fangelsi
Morðingi Heidi Thisland-Jensen var dæmdur til fimmtán ára fangelsisvistar í Mandal í Noregi í gær.
Gott að hitta gamla skólafélaga
Honum líkar vel og er alsæll. Hann er búinn að hitta gamla bekkjarfélaga og leikur sér við þá. Þetta gengur bara ofsalega vel,“ segir Óskar P. Friðriksson, afi Leifs Magnúsar, átta ára drengs í Vestmannaeyjum.
Besta gjöfin að fá hann heim
"Ég hef ekki fengið betri afmælisgjöf um ævina,“ segir Óskar P. Friðriksson, afi Leifs Magnúsar Grétarssonar, átta ára. Leif Magnús flytur til föðurfjölskyldu sinnar í Vestmannaeyjum frá Noregi 19. júní næstkomandi, á afmælisdegi afa síns.
Gríðarlegt áfall fyrir drenginn
"Það voru miklir fagnaðarfundir þegar við loksins hittum hann,“ segir Óskar P. Friðriksson úr Vestmannaeyjum sem hitti átta ára gamalt barnabarn sitt, Leif Magnús Grétarsson, í síðustu viku.
Heim til Eyja eftir harmleik í Noregi
„Þetta er hræðilegur harmleikur,“ segir Óskar P. Friðriksson, sem er á leið til Noregs á laugardag ásamt fjölskyldu sinni til þess að hitta barnabarn sitt, Leif Magnús Grétarsson, átta ára. Móðir Leifs Magnúsar, hin 28 ára gamla Heidi Thisland Jensen, var myrt aðfaranótt sunnudagsins í bænum Mandal í Noregi.
