AGS metur hvort rétt sé að hækka vaskinn

Fjögurra manna sérfræðinganefnd Alþjóðagjaldeyrissjóðsins um skattamál er stödd hér á landi til að ræða við stjórnvöld og hagsmunaaðila um skattkerfið og mögulegar breytingar á því. Í kjölfarið mun nefndin skila skýrslu um efnið.

Vinnan er liður í samstarfi stjórnvalda og AGS og fór hliðstætt starf fram á síðasta ári.

Meðal þess sem nefndin skoðar sérstaklega er hvort ráðlegt sé að hækka sjö prósenta virðisaukaskattsþrepið upp í 25,5 prósent.

Samkvæmt heimildum Fréttablaðsins kom sú skoðun sérfræðinganna fram á fundi í vikunni að þeir telja hækkun neysluskatta vel athugandi. Þar er einkum átt við hækkun sjö prósenta þrepsins og hækkun skatta á eldsneyti. Telja þeir svigrúm til að hækka skatta á eldsneyti í því ljósi að þeir eru enn lægri hér á landi en víða í Evrópu.

Undir sjö prósenta virðisaukaskattsþrepið heyra nú til dæmis helstu matvæli, bækur, geisladiskar, heitt vatn og rafmagn. Þá hyggst nefndin leggja mat á skattlagningu, verðlagningu og úthlutun afnota af náttúruauðlindum og yfirfara ýmsa umhverfisskatta. Ráðleggingar um endurbætur á núverandi kerfi verða bornar fram í sumarskýrslunni.

Jafnframt verður lagt mat á þær breytingar sem stjórnvöld hafa gert á skattkerfinu, til dæmis þrepaskiptingu þess og hækkun fjármagnstekjuskatts. Vörugjöld verða líka yfirfarin og skipting skatttekna milli ríkis og sveitarfélaga.

Eins og áður sagði er nefndin hér að ósk stjórnvalda, í samræmi við efnahagsáætlun og samstarf þeirra við Alþjóðagjaldeyrissjóðinn. Nefndin er skipuð þremur starfsmönnum sjóðsins og einum starfsmanni alþjóðlegrar stofnunar um skattamál í Hollandi. Hún mun dvelja hér til mánaðamóta og viða að sér upplýsingum og eiga viðræður við stjórnvöld og stjórnmálamenn, embættismenn, samtök atvinnurekenda og launþega og aðra þá sem láta sig skattamál varða.

bjorn@frettabladid.is