Formaður bæjarráðs í Reykjanesbæ gagnrýnir fjármálaráðherra harðlega

Gunnar Þórarinsson, formaður bæjarráðs Reykjanesbæjar, segir það alvarlegri tíðindi en orð fá lýst, hafi fjármálaráðherra beitt sér á bak við tjöldin til að tryggja að ekkert yrði af uppbyggingu álvers í Helguvík, eins og Morgunblaðið heldur fram í grein Agnesar Bragadóttur í dag.

Gunnar, sem er í Sjálfstæðisflokknum, segir slíka atlögu að atvinnumálum á Suðurnesjum, ógeðfellda og með öllu ólíðandi.

Þá þykir Gunnari málið enn alvarlegra fyrir þær sakir að fjármálaráðherra ber fulla ábyrgð á fjárfestingarsamningi ríkisstjórnarinnar og Norðuráls, þar sem því er heitið að veita verkefninu fullan stuðning. Í ljósi þessa hlýtur ráðherra að íhuga tafarlausa afsögn að mati Gunnars.

Katrín Júlíusdóttir iðnaðarráðherra sagði ekkert standa uppi á stjórnvöld á kaupum Magma á HS Orku en þar svaraði hún fyrirspurn Ragnheiðar Elínar Árnadóttur, þingmanns Sjálfstæðisflokksins, í óundirbúnum fyrirspurnum á Alþingi í morgun.

„Þarna var verið að vinna drög að samningum, þetta var ekkert baktjaldamakk," svaraði Katrín og benti á að gögnin vísuðu til þess þegar ríkið, ásamt sveitarfélögum og lífeyrissjóðum hugðist kaupa hlut í HS Orku. „Um það fjölluðu drögin. Það er ekkert óeðlilegt að menn setji saman framtíðarsýn hvað það varðar - og það þarf ekki að vera til höfuðs framtíðarinnar," sagði Katrín við þetta tækifæri.

Hún segir gögnin sem liggja fyrir í grein Morgunblaðsins, ágæta samantekt, en þar séu þó dregnar rangar ályktanir sem þurfi að skoða samhliða fjölmiðlaumfjöllun á sínum tíma.

Steingrímur er staddur erlendis og því var hann ekki viðstaddur fyrirspurnir á Alþingi í morgun.