Stór hluti Landsbanka seldur

Ríkisstjórnin íhugar að selja um 18,7% hlut í Landsbanka Íslands. Hlutur þessi er sem stendur í vörslu skilanefndar gamla bankans og ætti að mestu leyti að renna til ríkisins, þegar væntanlegt uppgjör verður milli gömlu og nýju bankanna, segir Steingrímur J. Sigfússon fjármálaráðherra. Með þeirri eignaraukningu yrði Landsbankinn nær eingöngu í ríkiseigu.

„En þarna er á ferðinni umtalsverður eignarhlutur sem engin skuld stendur á móti, þannig að þar yrði um hreinan söluhagnað að ræða ef ríkið kysi að auka ekki hlut sinn í bankanum,“ segir Steingrímur, sem hefur reifað hugmyndir um að ríkið láti sér nægja 75% hlut í bankanum.

Fram hefur komið að hugsanlega verði 13% hlutur ríkisins í Arion banka seldur, sem og 5% hlutur í Íslandsbanka. Þá er horft til þess að endurselja ýmsar fasteignir sem lent hafa í kjöltu ríkisins. Ekki stendur til að selja hluti ríkisins í sparisjóðum að svo stöddu.

Næsta skref, segir Steingrímur, er að móta pólitíska stefnu um þessa hluti „með vönduðum og viðurkenndum hætti“ og lítur hann þá sérstaklega til reynslu Norðmanna af ríkisbankarekstri. Hann ítrekar að málið sé á undirbúningsstigi, best sé að anda rólega.

Um hvort tryggja skuli dreifða eignaraðild, segir Steingrímur: „Í tilviki litlu bankanna erum við með svo hverfandi lítinn eignarhluta að það hvernig honum yrði ráðstafað hefur ekki mikið vægi í sambandi við eignarhaldið þar. Ef þeir bankar seldust, sem skilanefndirnar í sjálfu sér stefna að, þá væntanlega myndi hlutur ríkisins vera seldur þar með. Auðvitað er ekki útilokað að hann yrði seldur sjálfstætt, en það yrði alltaf í samráði við meirihlutaeigendur.“

Um Landsbankann segir hann hins vegar: „Ég teldi auðvitað mjög gott að þegar að slíku kæmi yrði viðkomandi fyrirtæki skráð og það yrði verðmyndun á markaði og sú eign gæti þá mjög gjarnan orðið að einhverju leyti dreifð, en við erum bara ekki komin á þann stað að útlista nákvæmlega hvernig það yrði hugsað. Menn geta treyst einu: það verða ekki vinnubrögðin frá 2002 sem verða viðhöfð.“- kóþ