Æðstu stjórnendur sluppu við uppsagnir

Þeir 57 starfsmenn Arion banka sem sagt var upp voru starfandi á öllum sviðum bankans, segir Iða Brá Benediktsdóttir forstöðumaður á samskiptasviði bankans. Hún segir að flestir þeirra hafi verið starfandi á rekstrarsviði og viðskiptabankasviði.

Aðspurð segir Iða Brá að engum úr framkvæmdastjórn bankans hafi verið sagt upp en einhverjir millistjórnendur hafi verið á meðal þeirra sem fengu uppsagnarbréf. Engir aðrir starfsmenn eða stjórnendur bankans hafa þurft að taka á sig launalækkanir samfara þessum uppsögnum.

Auk þeirra 57 sem hætta nú hafa um 30 hætt á liðnu ári. Flestir hinna þrjátíu hafa þó hætt að eigin frumkvæði. Iða segir að bankinn hafi verið í hagræðingaraðgerðum, t.d. með breytingu á útibúaneti og þetta sé stór liður því.

Í fréttatilkynningu sem Arion banki sendi frá sér fyrr í dag segir að rekstur íslenska fjármálakerfisins sé of kostnaðarsamur. Fjöldi starfsfólks hjá fjármálafyrirtækjum hér á landi sé of mikill miðað við umfang kerfisins. Þessi staðreynd eigi einnig við um Arionbanka.