Hrikalegar tölur úr Ytri Rangá

Ytri Rangá fór á toppinn yfir aflahæstu laxveiðiár landsins í viðmiðunarviku LV, sem nær frá miðvikudegi til miðvikudags. Í gærkvöldi var Ytri Rangá með 3.388 laxa eftir 736 laxa viku!

Á sama tíma var vikuveiðin mjög mikil, en ekki svona svaðaleg þó í Eystri Rangá sem fyrir vikið datt niður í annað sætið og var með 3.372 laxa í gærkvöldi. Ekki mikill munur í sjálfu sér, en þessi fantalega veiði í Ytri Rangá helgast af því að „maðkaopnun“ var í vikunni. Í gegnum tíðina hefur umrædd „opnun“ þó verið meiri spónveiðitörn í Ytri Rangá heldur en maðkveiðitörn, en allt um það, bara fyrstu tvær vaktirnar gáfu 180 laxa eftir því sem okkur var tjáð. Framhaldið hefur verið í stíl og fylgir sögunni að mikil veisla sé í gangi, mikið af fiski fyrir og lax enn að ganga af umtalsverðum krafti. Þessar heildartölur eru nokkuð lakari en í fyrra, en göngur eru greinilega mun seinna á ferð og enginn vafi að lokatölur verða vel háar og gildir það um báðar Rangárnar.

Meira á http://www.votnogveidi.is/frettir/eru-thau-ad-faann/nr/4009