Þungarokkið bjargaði lífi norsks drengs

13 ára gamall drengur frá Noregi komst heldur betur í hann krappan á dögunum. Svo virðist sem þungarokk hafi bókstaflega bjargað lífi drengsins.

Það var í síðustu viku sem þrettán ára gamall drengur frá Noregi var að ganga heim á leið úr skólanum sínum í Rakkested þegar hann lenti óvæntri lífshættu. Drengurinn þurfti að fara í gegnum skóglendi til þess að komast heim til sín. Skyndilega sá hann að hjörð af úlfum var búin að umkringja hann. Úlfarnir gerðu sig líklega til þess að ráðast á drenginn.

Pilturinn var að sjálfsögðu logandi hræddur. Honum hafði verið kennt það aðeins örfáum dögum áður að ekki mætti hlaupa í burtu ef úlfur gerði sig líklegan til þess að ráðast á mann. Drengurinn brá því á það ráð að veiða farsímann sinn upp úr vasanum og spila lag með þungarokkssveitinni Megadeth á hæstu stillingu.

Svo virðist sem bragðið hafi heppnast, úlfunum líkaði rokkið illa og hópurinn tvístraðist í sundur. Drengurinn komst heill á húfi heim samkvæmt norskum fjölmiðlum.