Byr ekki seldur án samþykkis Alþingis

Steingrímur J. Sigfússon, fjármálaráðherra, segir að Byr verði ekki seldur án samþykkis Alþingis og að ríkið muni ekki tapa á sölunni.

Tilkynnt var um að Íslandsbanki myndi kaupa allt hlutafé bæði Byrs sparisjóðs og fjármálaráðuneytisins í nýja bankanum Byr hf. þann 13. júlí síðastliðinn. í tilkynningu kom fram að sameiningin væri háð samþykki Samkeppnis- og Fjármálaeftirlitanna, en Eygló Harðardóttir, þingmaður Framsóknar, hefur ásamt fleirum haldið því á lofti að í tilviki ríkisins þurfi einnig að liggja fyrir lagaheimild fyrir sölunni. Með öðrum orðum þurfi að afla samþykkis Alþingis, og það hafi ekki verið gert.

„Það er að hluta til rétt og við munum væntanlega afla heimilda fyrir þessum og fleiri ráðstöfunum til að hafa það algjörlega hafið yfir vafa," segir Steingrímur.

„Það eru ýmsir fyrirvarar í þessum samningum og seljandinn veit af því að við munum þurfa að afla heimilda fyrir ráðstöfun á þessum litla hlut ríkisins. En það er ljóst að ríkið, sem algjör minnihlutaaðili í þessum viðskiptum, er hvort sem er ekki ráðandi og þau hefðu í sjálfu sér getað farið fram án samþykkis okkar," segir Steingrímur og bætir við að allt sé í góðu á milli þeirra sem að viðskiptunum koma.

Margir hafa gagnrýnt að kaupverðið hafi ekki fengist gefið upp vegna trúnaðarákvæða í kaupsamkomulaginu, en Steingrímur fullyrðir að ríkið fái eiginfjárframlag sitt við stofnun bankans að mestu til baka, alls 900 milljónir króna. Endanlegt kaupverð verði þó ekki gefið upp fyrr en fyrirvörum er aflétt og ljóst að af viðskiptunum verði.

„Enda má segja að ef þau strönduðu á athugasemdum eftirlitsaðila, þá væri málinu lítill greiði gerður með því að hafa upplýst kaupverðið," segir Steingrímur.