Róbert Wessman segir forstjóra Bosnalijek hafa beðið um mútugreiðslu

Stjórnendur bosníska lyfjafyrirtækisins Bosnalijek segja að að Alvogen, lyfjafyrirtæki Róberts Wessman, hafi ætlað að beita ólöglegum aðferðum við að fjárfesta í félaginu. Róbert vísar þessu á bug og segir að forstjórinn hafi óskað eftir mútugreiðslum til að liðka fyrir kaupunum en hann segir spillinguna allsráðandi í Bosníu- og Hersegóvínu.

Bandariska lyfjafyrirtækið Alvogen Group hefur undir forystu Róberts Wessman, starfandi stjórnarformanns, sett sér markmið um að komast í hóp tíu stærstu samheitalyfjafyrirtækja heims innan fimm ára.

Róbert hefur ferðast víða til að skoða áhugaverð tækifæri fyrir Alvogen en eitt af þeim fyrirtækjum sem Alvogen hafði í sigtinu var bosníska lyfjafyrirtækið Bosnalijek en ríkissjóður Bosníu- og Hersegóvínu og sjóður á vegum Alþjóðabankans eiga saman 28 prósenta hlut í félaginu sem til stóð að selja á síðasta ári.

Í tilkynningu á vefsíðu Bosnalijek er máluð dökk mynd af samskiptum stjórnenda þess við fulltrúa Alvogen. Þar segir að fulltrúar Alvogen hafi ekki mætt þegar hlutabréf ríkisins í Bosnalijek voru boðin til sölu, þrátt fyrir að hafa gefið loforð í þá veru. Þá hafi stjórnendur Bosnalijek áttað sig á því að Alvogen hafi ætlað að kaupa hlutabréfin í fyrirtækinu með lántökum í Bosníu og hafi síðan ætlað að láta Bosnalijek greiða þessi sömu lán til baka. Helstu bankar í Bosníu- og Hersegovínu hafi lýst sig andsnúna þessum áformum þar sem slík aðferð við kaupin hafi verið á skjön við gildandi lög og reglur í landinu.

Eftir þetta hafi orðið ljóst að Alvogen hafi ekki verið hið sterka alþjóðlega fyrirtæki sem það þóttist vera og heldur hafi það aðeins viljað eignast ráðandi hlut í félaginu til að geta stjórnað því án nokkurrar eigin áhættu eða skuldbindinga. Alvogen hafi því enga þýðingu fyrir Bosnalijek lengur og í raun ógni það og áform þess tilvist bosníska fyrirtækisins, að því er fram kemur á vefsíðu þess.

Róbert Wessman sagði í samtali við fréttastofu í dag að forstjóri Bosnalijek hefði komið í veg fyrir að Alvogen framkvæmdi áreiðanleikakönnun á fyrirtækinu með það fyrir augum að fjárfesta í því. Alvogen hafi ætlað að fjárfesta í fyrirtækinu með eigin fé og því standist þessar yfirlýsingar stjórnenda Bosnalijek ekki. Þá sagði hann spillinguna í Bosníu meiri en hann hefði nokkru sinni áður kynnst. Meðal annars hefði forstjóri Bosnalijek óskað eftir persónulegri greiðslu frá Alvogen til að liðka fyrir kaupunum.

Stjórnendum Alvogens hafi orðið ljóst að stjórnendur Bosnalijek hafi tekið peninga út úr félaginu með hinum ýmsu aðferðum, t.d með því að gjaldfæra kostnað, og því hafi Alvogen ekki séð hag sinn í því að fjárfesta í því.

Nokkuð hefur verið fjallað um samskipti stjórnenda Alvogens við fulltrúa bosníska fyrirtækisins í bosnískum fjölmiðlum, en Róbert segist sjálfur hafa mætt í þónökkur viðtöl í sjónvarpi í Bosníu- og Hersegóvínu, m.a til að andmæla staðhæfingum stjórnenda Bosnalijek. thorbjorn@stod2.is