Björgunarsveitir leita að Matthíasi

Lögregla og björgunarsveitir munu í fyrramálið gera út leitarhópa í von um að finna Matthías Þórarinsson sem hefur verið saknað í nokkurn tíma. Lögregla hefur lýst eftir Matthíasi en það hefur engan árangur borið. Leitarhundar verða með í för um helgina en ekki hefur áður verið lagt í skipulega leit að Matthíasi, aðallega því lögregla hefur ekki vitað hvar skyldi leita hans.

Bifreið sem Matthías var á fannst brunnin í malargryfjunum við Esjurætur en ekkert bendir til að Matthías sé annað en heill á húfi. Leitarflokkarnir munu kemba næsta nágrenni þess svæðis sem bifreiðin fannst á.

Matthías bjó í húsbíl sínum en lögreglan útilokar ekki að hann sé kominn á nýjan bíl, hafi fengið inni á bóndabæ eða hafist hreinlega við úti. Hann er mikill náttúruvinur og einfari, að því er lögregla hefur eftir móður Matthíasar. Hann afneitar nútímatækni á borð við farsíma og greiðslukort, lifir afar sparlega og gengur í heimasaumuðum fötum. Hann eyðir mestum sínum tíma í að lesa og teikna.

Matthías hefur áður látið undir höfuð leggjast að láta ættingja sína vita af sér í lengri tíma en þar sem tíminn nú er orðinn óvenju langur var ákveðið að lýsa eftir honum.

Þeir sem hafa upplýsingar um ferðir Matthíasar eru hvattir til að hafa samband við lögregluna í síma 444-1000.

Hann er 21 árs gamall, um 180 sentimetrar á hæð, ljósskolhærður og talinn halda til á Suðurlandi.