Hagvaxtarspá hækkuð í 2,8% þrátt fyrir óvissu

Seðlabankinn spáir því nú að meiri vöxtur einka- og samneyslu og kröftugri viðsnúningur atvinnuvegafjárfestingar utan stóriðju, skipa og flugvéla gerir það að verkum að gert er ráð fyrir meiri hagvexti á þessu ári en í apríl eða 2,8% í stað 2,3%. Þetta muni gerast þrátt fyrir verulega óvissu í efnahagsmálum heimsins.

Þetta kemur fram í ritinu Peningamál sem kom út í morgun samhliða stýrivaxtaákvörðun bankans. Þar segir að óvissa hafi aukist verulega á alþjóðlegum fjármálamörkuðum undanfarnar vikur og blikur eru á lofti varðandi alþjóðlegan hagvöxt. Áhyggjur markaðsaðila af mögulegum nýjum samdrætti eftirspurnar í Bandaríkjunum og Evrópu hafa aukist en spáaðilar gera enn ekki ráð fyrir slíkri þróun.

„Áhættan hefur þó aukist sem mun hafa neikvæð áhrif á efnahagsbatann hér á landi ef hún raungerist. Þótt gert sé ráð fyrir sæmilegum útflutningsvexti á næstu tveimur árum, hafa horfur heldur versnað frá því sem spáð var í Peningamálum í apríl," segir í Peningamálum.

„Horfur um viðskiptakjör hafa einnig versnað. Meiri vöxtur einka- og samneyslu og kröftugri viðsnúningur atvinnuvegafjárfestingar utan stóriðju, skipa og flugvéla gerir það hins vegar að verkum að nú er gert ráð fyrir meiri hagvexti á þessu ári en í apríl eða 2,8% í stað 2,3%. Batinn á vinnumarkaði virðist jafnframt vera meiri en áður var reiknað með. Verðbólga hefur aukist undanfarið og mun hraðar en gert hafði verið ráð fyrir í síðustu spá Seðlabankans.

Verðbólguhorfur til næstu tveggja ára hafa jafnframt versnað töluvert og er nú gert ráð fyrir að verðbólga haldi áfram að aukast og nái hámarki á fyrsta fjórðungi næsta árs þegar hún verði tæplega 7% að meðaltali í ársfjórðungnum.

Meginástæður versnandi verðbólguhorfa eru mun meiri launahækkanir í nýgerðum kjarasamningum en gert var ráð fyrir í apríl, meiri hækkun húsnæðis- og olíuverðs en áður var spáð, veikara gengi krónunnar, hratt hækkandi verðbólguvæntingar og snarpari viðsnúningur innlendrar eftirspurnar. Eftir sem áður er búist við að áframhaldandi slaki í þjóðarbúskapnum tryggi að verðbólga hjaðni á ný þegar áhrif kostnaðarhækkana taka að fjara út og að hún verði komin í verðbólgumarkmiðið á seinni hluta ársins 2013.

Mikil óvissa er hins vegar um hversu viðvarandi þessar kostnaðarhækkanir verða. Einnig er töluverð óvissa um umfang efnahagsslakans og hversu vel hann dugir til að koma í veg fyrir að verðbólga verði þrálátari."