Fóru fram á varðhald vegna gruns um kerfisbundna markaðsmisnotkun

Dómari í Héraðsdómi Reykjavíkur féllst ekki á gæsluvarðhaldskröfu embættis sérstaks saksóknara, er beindist að Elmari Svavarssyni, fyrrum miðlara hjá Glitni, þar sem dómari taldi ekki sannanir liggja fyrir um að hann hefði átt þátt í kerfisbundinni markaðsmisnotkun, eins og honum var gefið að sök í kröfugerðinni. „Það var einfaldlega ekki fallist á að fyrir lægju sannanir fyrir því að hann hefði brotið lög. Þar á meðal var ekki fallist á að hann hefði átt aðild að kerfisbundinni markaðsmisnotkun, sem ég tel reyndar að séu fráleitar ásakanir," segir Karl Georg Sigurbjörnsson hrl., lögmaður Elmars.

Í kröfugerð embættis sérstaks saksóknara kemur fram að rannsóknin beinist m.a. að markaðsmisnotkun allt frá árinu 2004 og fram á árið 2008, samkvæmt heimildum fréttastofu.

Þrír fyrrverandi starfsmenn Glitnis voru í gærkvöldi úrskurðaðir í vikulangt gæsluvarðhald. Það eru Lárus Welding, fyrrverandi forstjóri bankans, Jóhannes Baldursson, fyrrverandi framkvæmdastjóri markaðsviðskipta, og Ingi Rafnar Júlíusson, fyrrverandi starfsmaður markaðsviðskipta.

Eins og greint var frá á Vísi fyrr í dag, kærðu tveir þeirra sem úrskurðaðir voru í varðhald, strax niðurstöðu héraðsdóms til Hæstaréttar. Ekki er útilokað að þeir geri það allir, þar sem kærufresturinn er innan þriggja sólarhringa samkvæmt lögum.

Í tilkynningu frá embætti sérstaks saksóknara frá því í gær kemur fram að rannsókn málsins tengdist einkum fjórum þáttum. Þeir eru:

1. Kaup eigin viðskipta Glitnis á hlutabréfum útgefnum af bankanum á verðbréfamarkaðinum. Einnig kaup bankans og ráðstöfun á hlutabréfum útgefnum af FL Group.

2. Lánveitingar til ýmissa félaga vegna kaupa á hlutabréfum útgefnum af bankanum í lok árs 2007 og á árinu 2008. Upphaflegur höfuðstóll nefndra lánveitinga er talinn nema samtals tæpum 37 milljörðum króna.

3. Viðskipti með framvirka samninga í hlutabréfum útgefnum af bankanum.

4. Sölutrygging Glitnis á 15 milljarða hlutafjárútboði FL Group áramótin 2007 og 2008.

Til rannsóknar er grunur um meint brot á auðgunarbrotakafla hegningarlaga í tengslum við ráðstafanir á fjármunum Glitnis, brot á lögum um verðbréfaviðskipti, lögum um fjármálafyrirtæki, lögum um ársreikninga og lögum um bókhald.