Björgum þeim frá hræðilegri martröð

Hungur ríkir á austurodda Afríku. Allt hefur lagst á eitt; átök, hátt matarverð og þurrkar með þeim afleiðingum að ellefu milljónir manna líða alvarlegan skort.

Viðvörunarbjöllurnar hringja og við getum ekki látið sem ekkert sé. Á hverjum degi fæ ég átakanlegar skýrslur frá fólki Sameinuðu þjóðanna sem er á staðnum. Búfénaður og geitur sómalískra flóttamanna er dauður úr þorsta og fólkið gengur vikum saman til að leita hjálpar í Keníu og Eþíópíu. Munaðarleysingjar koma einir; vannærðir og óttaslegnir – foreldrarnir látnir.

Við heyrum hræðilegar sögur frá Sómalíu af fjölskyldum sem hafa þurft að horfa upp á börn sín deyja eitt af öðru. Ein konan birtist nýlega í búðum Sameinuðu þjóðanna fyrir uppflosnað fólk, um 140 kílómetra fyrir sunnan Mógadisjú. Hún átti þriggja vikna ferð, fótgangandi, að baki. Halima Omar frá Shebelle-héraði var eitt sinn talin vel stæð. Í dag eftir þriggja ára þurrk rétt skrimtir hún. Fjögur af sex börnum hennar eru látin. „Það er ekkert verra en að horfa á barn sitt deyja vegna þess að maður getur ekki fætt það,“ segir hún um eldraun sína. „Ég er að missa alla von.“

Við spyrjum okkur: hvernig stendur á því að þetta gerist enn á ný? Þegar öllu er á botninn hvolft er nægur matur í heiminum. Jú, vissulega eru erfiðir tímar víða um heim, en samt sem áður höfum við alltaf frá aldaöðli svarað því kalli að koma nauðstöddum meðbræðrum okkar til hjálpar, jafnvel þegar verst hefur árað.

Af þessum sökum leita ég til ykkar í dag og bið ykkur að rétta Sómalíu hjálparhönd nú þegar neyðin er stærst. Til þess að bjarga því fólki sem er í lífshættu – að langmestu leyti konum og börnum – þurfum við 1,6 milljarða Bandaríkjadala aðstoð. Hingað til hefur aðeins tekist að afla helmings þessa fjár.

Halima Omar hin sómalíska sagði við okkur: „Kannski eru þetta örlög okkar, en kannski gerist kraftaverk og okkur verður bjargað frá þessari martröð.“

Ég get ekki sætt mig við að þetta séu örlög hennar. Við skulum í sameiningu bjarga henni og löndum hennar frá þessari hræðilegu martröð.