Aðeins fimm af tuttugu hæstu skattgreiðendum á lista í fyrra

Einungis fimm af þeim sem eru á lista yfir tuttugu hæstu skattgreiðendur árið 2010 voru á sama lista árið áður. Mörg ný og óþekkt nöfn er að finna á listanum í ár. Skattakóngurinn er landeigandi í Kópavogi.

Þorsteinn Hjaltested greiðir tæpar 162 milljónir króna í opinber gjöld fyrir árið 2010 en hann erfði Vatnsendalandið í Kópavogi frá föður sínum og seldi Kópavogsbæ.

Í öðru sæti situr Andri Már Ingólfsson hjá Primera Air en hann greiðir tæpa 131 milljón króna í skatta og í þriðja sæti er Skúli Mogensen einn af eigendum MP banka með um 111 milljónir en hann var ekki á listanum í fyrra.

Guðbjörg Matthíasdóttir, útgerðarkona og stærsti eigandi útgáfufélags Morgunblaðsins greiðir um 98 milljónir í opinber gjöld í ár en hún var skattadrottning landsins í fyrra með meira en þrjú hundruð og fjörtíu milljónir í skatta.

Athygli vekur að fáir í efstu sætum listans hafa verið þar áður eða einungis fimm af þeim tuttugu sem greiða hæst opinber gjöld. Þá eru mörg ný og lítið þekkt nöfn á listanum.

Einnig má þó finna áberandi fólk úr íslensku viðskiptalífi undanfarin ár. Jóhannes Jónsson fyrrum stjórnarformaður Haga greiðir rúmar 78 milljónir í opinber gjöld en sonur hans Jón Ásgeir greiðir um helming af þeirri upphæð.

Magnús Ingi Óskarsson stofnandi sprotafyrirtækisins Calidris, sem hannar hugbúnað fyrir tölvukerfi flugfélaga, er nýliði á listanum með rúmar 75 milljónir. Ingunn Gyða Wernersdóttir kaupsýslukona greiðir rúmlega 61 milljón.

Forstjóri Landsvirkjunar Hörður Arnarson rúmar 48 milljónir en Bjarni Ármannsson fyrrum bankastjóri Glitnis rúmar 37.