Vigri vekur athygli í slippnum í Reykjavík

Undanfarna daga hefur togarinn Vigri RE 71 verið í slipp í Reykjavík og hefur skipið dregið að sér athygli gesta og gangandi enda tígulegt á að líta að því er segir á vefsíðu Faxaflóahafna. 

Vigri er stærsta og þyngsta skipið sem hægt er að taka upp í Norðurbrautina og segja má að það líða mörg ár á milli þess að sjá má upptöku af þessari stærðargráðu.

Þegar Reykjavíkurhöfn yfirtók slippana í Reykjavík á árinu 1995 og fór í endurbætur og styrkingar á mannvirkjum og búnaði þá var upptökugeta brautar endurmetin og einmitt þetta skip, Vigri RE 71, lagt til grundvallar því sem nefnist hámarksupptökuþyngd skips sem er 2.350 tonn.