Spáir því að verðbólgan aukist í 3,2% í maí

Greining MP Banka gerir ráð fyrir að vísitala neysluverðs mælist 0,8% hærri í maí en í apríl. Gangi það eftir eykst 12 mánaða verðbólga úr 2,8% og í 3,2%.

Þetta kemur fram í Markaðsvísi greiningarinnar. Þar segir að tæpur helmingur hækkunarinnar í mánuðinum stafar af tveimur þáttum. Annars vegar gjaldskrárhækkun Orkuveitunnar sem tekur gildi í maí og hins vegar leiðréttingu á vísitölu byggingarkostnaðar. Þessir tveir þættir valda um 0,35% hækkun vísitölunnar í mánuðinum.

Gengi krónunnar hefur gefið aðeins eftir frá síðasta mánuði. Það hefur áhrif á innflutningsverð og meðal annars hefur bílverð hækkað nokkuð í mánuðinum. Fasteignaverð virðist enn á uppleið en það hefur hækkað um 2% síðustu þrjá mánuði. Á móti því kemur vaxtalækkun á fasteignalánum en sumir bankar hafa fylgt Íbúðalánasjóði eftir og  lækkað vexti íbúðalána hjá sér.

„Við reiknum þó með að verðhækkanir vegi enn þyngra og reiknuð húsaleiga hækki í mánuðinum,“ segir í Markaðsvísinum.

„Við eigum frekar von á að 12 mánaða hækkun VNV haldi áfram að aukast að minnsta kosti  næstu 4 mánuði. Í júní og júlí í fyrra lækkað VNV um samtals 1% og hækkunin næstu tvo mánuði þar á eftir nam  alls 0,2%. Verðbólguþrýstingur vegna hækkandi launa og hugsanlega veikari krónu má ekki vera mikill ef verðbólga á að haldast innan við 4% fram á haustið.“