Ákvörðun um Nubo "verður að byggjast á lögmætum sjónarmiðum“

Aukið samráð ráðuneyta við hagstjórn er rauði þráðurinn í nýrri efnahagsáætlun stjórnvalda. Efnahags- og viðskiptaráðherra vill virkja samráð á öðrum sviðum eins og í tilviki fjárfestingar Huangs Nubos en á endanum sé það innanríkisráðherra að gefa grænt ljós á fjárfestingu hans.

Árni Páll Árnason, efnahags- og viðskiptaráðherra, kynnti nýja efnahagsáætlun stjórnvalda á blaða- og fréttamannafundi í Þjóðmenningarhúsinu í dag. Hluti af áætluninni er innleiðing samhæfðrar hagstjórnar, en það er í samræmi við samþykkt ríkisstjórnarinnar frá 1. febrúar á þessu ári.

Markmiðið með samhæfri hagstjórn að ráðuneytin stilli saman strengi sína svo hægt sé fyrirbyggja að leikurinn verði endurtekinn frá árunum fyrir hrun, en það kom m.a fram í skýrslu rannsóknarnefndar Alþingis að skattalækkanir á þenslutímum árin 2005-2007 hafi komið á kolröngum tíma og haft neikvæð áhrif á hagkerfið. Voru Efnahags- og framfarastofnunin OECD, Alþjóðagjaldeyrissjóðurinn og Seðlabankinn líka á einu máli um þetta.

Meðal markmiða ætlunarinnar sem kynnt var í dag er að:

-Losa heimili, fyrirtæki og hið opinbera úr ósjálfbærri skuldsetningu

-Mótuð verði peningastefna til framtíðar og gjaldeyrishöft afnumin í áföngum

-Jafna samkeppnisstöðu fyrirtækja gegnum skattaumhverfi

-Nýta tækifæri í ferðaþjónustu með lágu gengi krónunnar - átakið „Ísland allt árið"

-Atvinnuleysi verði komið niður fyrir 5% árið 2013

-Skuldir ríkis og sveitarfélaga verði komnar niður fyrir 60% af landsframleiðslu árið 2020

-Losað um gjaldeyrishöft í samræmi við áætlun ríkisstjórnarinnar og Seðlabankans.

Samhæfð hagstjórn er af hinu góða en má auka samráð öðrum sviðum innan stjórnarráðsins, t.d í málum sem skipta þjóðarbúið miklu máli eins og í tilviki fjárfestingar Huangs Nubos á Grímsstöðum á Fjöllum? „Ákvörðunarvald í því máli er hjá einum ráðherra og almennt er það nú þannig að í þessari efnahagsáætlun er ákvörðunarvald einhvers staðar á endanum, en við viljum búa til farveg samráðs og samtals. Í þessu tiltekna máli, varðandi Grímsstaði á Fjöllum, hef ég komið á framfæri sjónarmiðum sem skýra hinn lögmæta grunn fyrir þá ákvörðun út frá sjónarhóli erlendrar fjárfestingar og mikilvægis hennar fyrir íslenskt efnahagslíf. Með sama hætti þurfum við að tryggja að það eigi sér stað samtöl og að ákvarðanir séu teknar á réttum efnislegum grunni og að menn blekki sig ekki um efnislegan grunn ákvarðana, heldur liggi besta fáanlega hagfræðilega greining fyrir á líklegum áhrifum ákvarðana áður en þær eru teknar," segir Árni Páll.

Er hægt að færa fyrir því rök að það sé óæskilegt að ákvörðun í jafn stóru máli og fjárfesting Huangs Nubos er hvíli á herðum eins manns? „Ákvörðunarvaldið liggur hjá innanríkisráðherra varðandi þetta tiltekna atriði en sú ákvörðun verður auðvitað að byggjast á lögmætum sjónarmiðum. Og það þarf að leggja þar efnisleg rök til grundvallar. Ég hef fært ítarleg rök fyrir því hvaða sjónarmið það eru sem benda til þess að það sé rétt að fallast á þessa beiðni. Ákvörðunarvaldið er á endanum á einum stað, efnisgrunnurinn verður að liggja fyrir og það er hann sem ákvörðunin verður á endanum dæmd á," segir efnahags- og viðskiptaráðherra. thorbjorn@stod2.is