Þarf þrjúþúsund notendur á mánuði

Í Holtagörðum er nú verið að undirbúa opnun nýrrar líkamsræktarstöðvar en eigendur hennar ætla sér að tröllríða markaðnum hér á landi með því að bjóða ódýr líkamsræktarkort án bindingar. Stöðin þarf þrjúþúsund korthafa til að reksturinn gangi upp.

Það er nóg um að vera í Holtagörðum þessa dagana en þar er líkamsræktarfrumkvöðullinn Ágúst Ágústsson ásamt foreldrum sínum í óða önn að innrétta glænýja líkamsræktarstöð.

“Við ætlum að bjóða upp á alvöru æfingaraðstöðu fyrir helminginn af verðinu, 2990 á mánuði og enga bindingu,“ segir Ágúst, sem er framkvæmdastjóri Reebook fitness.

Stöðin verður 3700 fermetrar með fimm hóptímasölum, þar á meðal 100 hjóla spinningsal, heitum sal fyrir hot yoga og síðar koma crossfitsalir. Þá er stór tækjasalur með öllum þeim tækjum og tólum sem þarf til að taka vel á því.

Ágúst segir ótvírætt þörf á enn einni líkamsræktarstöð. „Það er mikið af stöðvum en þær eru margar hverjar farnar að sprengja utan af sér. Svo er fullt af fólki sem að vill ekki binda sig og 2990 á vonandi að heilla það líka.“

Loftræstikerfi stöðvarinnar er einstaklega öflugt og skiptir um loft á 10 mínútna fresti. Ágúst segir áhugann vera mikinn og til dæmis hafi yfir tvö hundruð sótt um nokkur laus störf sem auglýst voru.

„Við fáum mikið af fyrirspurnum um tímana og aðstöðuna og hvenær við ætlum að opna,“ segir Ágúst og vill hér með koma því algjörlega á hreint. „11.11.2011 kl.11 og facebook er ný síða. Þar eru komnir yfir 1200 á facebook síðu sem var að opna, óumbeðið.“