Leigumarkaðurinn óðum að dragast saman

Leigumarkaðurinn dregst nú óðum saman en samfelld fækkun hefur orðið á þinglýstum leigusamningum milli ára það sem af er árinu.

Fyrstu tíu mánuði ársins hefur alls 5.551 leigusamningum verið þinglýst á höfuðborgarsvæðinu samanborið við 5.944 á sama tíma í fyrra, sem jafngildir 6,6% fækkun á milli ára. Þetta mátti lesa út úr tölum sem Þjóðskrá Íslands hefur birt.

Fjallað er um málið í Morgunkorni greiningar Íslandsbanka. Þar segir að á sama tíma og leigumarkaðurinn dregst nú saman, eftir að hafa ríflega tvöfaldast í kjölfar hrunsins,  heldur kaupsamningum íbúðarhúsnæðis áfram að fjölga. Frá síðustu áramótum og fram til 3. nóvember hefur samtals verið þinglýst  3.818 kaupsamningum um íbúðarhúsnæði á höfuðborgarsvæðinu, sem er um það bil þriðjungi meira en á sama tímabili fyrra árs þegar  2.919 kaupsamningum hafði verið þinglýst.

„Þetta bendir til þess að landsmenn eru nú að færa sig úr leiguhúsnæði yfir í eignarhúsnæði.  Bendir þetta einnig til þess að sú mikla veltuaukning sem orðið hefur í kaupum og sölu íbúða sé ekki fyrst og fremst knúin áfram að fjárfestum sem eru að nýta þær íbúðir til útleigu. Leigumarkaðurinn er samt enn stór í samanburði við það sem hann var fyrir bankahrunið,“ segir í Morgunkorninu.

„Á árunum 2006 og 2007 var til að mynda um það bil 3.200 leigusamningum með íbúðarhúsnæði  þinglýst hvort ár fyrir sig, en nú þegar fyrstu tíu mánuðir þessa árs eru liðnir hefur samtals verið þinglýst 5.551 leigusamningi með íbúðarhúsnæði.“