Seldu 600 kíló á þremur dögum

Fyrsta sending af íslenska neftóbakinu Lundi sem kom nýlega á markað hér á landi seldist upp á þremur dögum en í henni voru um 600 kíló af tóbaki. Framkvæmdastjórinn segir að salan hafi gengið vonum framar.

Ásgeir Johansen, framkvæmdastjóri Rolf Johansen & Company, sem flytur vöruna inn frá Danmörku segir að þegar fyrsta pöntunin var afgreidd hafi forsvarsmenn fyrirtækisins velt því fyrir sér hvort að þeir væru að panta alltof mikið. Miðað við útreikninga þeirra átti magnið að duga í fjóra mánuði. „Við pöntuðum 600 kíló og það kláraðist á þremur dögum," segir hann.

Varan er framleidd sérstaklega fyrir fyrirtækið og fæst hún einungis hér á landi. Eftir að búið var að finna framleiðanda tók við yfir ár í þróa vöruna. Að lokum samþykkti ÁTVR neftóbakið en það þarf að uppfylla ýmis skilyrði svo sem kornastærð og fleira.

Sala á neftóbaki rúmlega tvöfaldaðist á sjö ára bili frá 2003 til 2010, úr 11,7 tonnum upp í 25,5 tonn. Á Íslandi hefur verið bannað með lögum að flytja inn, framleiða og selja fínkornótt neftóbak og munntóbak frá því að ESB-tilskipun sem gerði aðildarríkjum ESB og EES-ríkjunum skylt að banna munntóbak var leidd í lög hér 1. febrúar 1997.

Guðbjartur Hannesson, velferðarráðherra, hefur lagt fram frumvarp á Alþingi um breytingu á lögum um tóbaksvarnir þar sem tekið er upp nýtt ákvæði þar sem segir að bannað verði að flytja inn, framleiða og selja allt bragð- og lytkarblandað reyklaust tóbak. Þetta þótti ekki nægilega skýrt í lögunum og er frumvarpið til að bregðast við tilraunum á innflutningi á bragðbættu munntóbaki.