Straumur er nýr fjárfestingabanki

Fjármálaeftirlitið hefur veitt Straumi fjárfestingabankaleyfi. Straumur er nýtt félag með nýtt bankaleyfi. Félagið er í eigu ALMC, en það félag var reist á gamla Straumi-Burðarás og er í eigu kröfuhafa þess.

Í fréttatilkynningu kemur fram að Straumur leggur áherslu á þjónustu á sviði markaðsviðskipta og fyrirtækjaráðgjafar. Starfsmenn Straums eru um 25 talsins og starfsstöð félagsins er að Borgartúni 25 í Reykjavík. Stjórn Straums skipa; Oscar Crohn, Örvar Kærnested, Sigurgeir Guðlaugsson, Finnur Reyr Stefánsson og Christopher Perrin sem er formaður stjórnar.

„Straumur er sjálfstæður og óháður fjárfestingabanki með öflugan hóp starfsmanna. Í því felst helsti styrkleiki okkar. Á Íslandi eru fjölmörg tækifæri til uppbyggingar. Það er mikið verk framundan og Straumur vill leggja sitt af mörkum við að endurreisa og styrkja íslenskt atvinnulíf. Nú er meiri þörf en nokkru sinni áður á fjárfestingu í íslensku atvinnulífi. Þar tel ég að Straumur muni gegna mikilvægu hlutverki,“ segir Pétur Einarsson, forstjóri Straums, í fréttatilkynningu.