Verðbólguálag á skuldabréfamarkaði tvöfaldast frá upphafi árs

Verðbólguálag til lengri tíma á skuldabréfamarkaði er nú hærra en það hefur verið frá ársbyrjun 2009, og hefur álagið tvöfaldast frá upphafi árs samkvæmt morgunkorni Íslandsbanka.

Þar segir að verðbólguálag til 7 ára sé nú 5,2%, en í janúarbyrjun var 7 ára álagið jafnt verðbólgumarkmiði Seðlabankans, eða 2,5%. Svipaða sögu má segja af 5 ára álaginu, sem hefur hækkað úr 2,1% í 4,7% á sama tímabili.

Hækkun álagsins hefur fyrst og fremst orðið fyrir tilstilli hækkunar á kröfu lengri óverðtryggðra ríkisbréfa. Þannig hefur til að mynda krafa ríkisbréfaflokksins RIKB25 hækkað úr 6,03% í 8,18% það sem af er ári. Krafa lengri flokka íbúðabréfa, sem myndar verðtryggða markflokkaferilinn á íslenska skuldabréfamarkaðinum, hefur hins vegar lítið breyst á sama tíma. Má þar nefna að raunkrafa HFF34-bréfa er nú 3,15% en var 3,27% í upphafi árs.

Verðbólguálag á markaði er ein þeirra vísbendinga um verðbólguvæntingar sem peningastefnunefnd Seðlabankans horfir til við vaxtaákvarðanir sínar að því er greinir frá í morgunkorninu. Við síðustu vaxtaákvörðun var álagið til 5 ára 4,3%, og hefur verðbólguálag á þennan kvarða því hækkað um 0,2% frá vaxtahækkun bankans um miðjan síðasta mánuð.

„Miðað við þann kvarða er því ekki hægt að segja að vaxtahækkunin, og þau skilaboð að fleiri slíkra kynni að vera að vænta á komandi mánuðum, hafi gert fjárfesta bjartsýnni á verðbólguhorfur til lengri tíma litið. Verður fróðlegt að sjá hvernig nefndarmenn túlka þá þróun við næstu vaxtaákvörðun að tveimur vikum liðnum,“ segir í morgunkorninu.