Lífleg viðskipti með atvinnuhúsnæði í júlí

Í júlí var 107 kaupsamningum og afsölum um atvinnuhúsnæði á höfuðborgarsvæðinu þinglýst og 25 utan þess. Heildarfasteignamat seldra eigna á höfuðborgarsvæðinu var 2043 milljónir króna en 188 milljónir króna utan þess. Af þessum samningum voru 16 um verslunar- og skrifstofuhúsnæði á höfuðborgarsvæðinu.

Þetta kemur fram á vefsíðu Þjóðskrár Íslands. Miðað við júní hefur samningum og afsölum fjölgað verulega en fjöldi þeirra var 45 í júní. Hinsvegar hefur dregið nokkuð úr fasteignamatinu sem var 2.450 milljónir kr. í júní á höfuðborgarsvæðinu en 263 milljónir kr. utan þess.

Í júlí voru 42 kaupsamningar um atvinnuhúsnæði á höfuðborgarsvæðinu skráðir í kaupskrá og 8 utan þess. Heildarupphæð samninga á höfuðborgarsvæðinu var 260 milljónir króna og fasteignamat þeirra eigna sem samningarnir fjölluðu um 392 milljónir króna.

Heildarupphæð samninga utan höfuðborgarsvæðisins var 56 milljónir króna og fasteignamat þeirra eigna sem samningarnir fjölluðu um 64 milljónir króna. Af þessum samningum voru 4 um verslunar- og skrifstofuhúsnæði á höfuðborgarsvæðinu.