Gunnar Heiðar með tvö mörk í sigri Norrköping

Gunnar Heiðar Þorvaldsson var maðurinn á bak við 2-1 heimasigur Norrköping á Djurgården í sænsku úrvalsdeildinni í fótbolta í kvöld en Eyjamaðurinn skoraði bæði mörk sinna manna í leiknum.

Norrköping var búið að tapa þremur leikjum í röð þar af steinlá liðið 0-5 fyrir Kalmar í síðasta leik þegar Gunnar Heiðar var í leikbanni. Norrköping komst upp úr fallsæti með þessum sigri.

Gunnar Heiðar snéri ferskur til baka eftir leikbann og var búinn að skora tvö mörk eftir aðeins ellefu mínútna leik. Fyrra mark hans kom á 6. mínútu og það seinna aðeins fimm mínútum seinna.

Christer Youssef minnkaði muninn fyrir Djurgården á 17. mínútu og Norrköping missti Bobbie Friberg Da Cruz síðan af velli með tvö gul spjöld þegar þrjár mínútur voru til hálfleiks.

Gunnar Heiðar spilaði fyrstu 70 mínútur leiksins en var síðan skipt útaf. Hann hefur nú skorað 7 mörk í 20 leikjum í sænsku úrvalsdeildinni á þessu tímabili.