Evran betri en kanadadollar

Að mati aðalhagfræðings seðlabankans er evran heppilegust ef íslendingar ákveða að reka fastgengisstefnu gagnvart öðrum gjaldmiðli. Hann segir Íslendinga ekki eiga nógu mikil viðskipti við Kanadamenn til að dollarinn sé betri.

Þórarinn Pétursson, aðalhagfræðingur seðlabankans, mælir með fastgengisstefnu fyrir Ísland ef marka má niðurstöður rannsókna hans. Þær benda til að sjálfstæður gjaldmiðill í litlu hagkerfi virki sveifluvaldandi, frekar en sveiflujafnandi, eins og fréttastofa hefur greint frá.

„Þær benda til þess að hörð fastgengisstefna sé það sem við ættum að taka upp. Það getur verið innganga í myntbandalag eða myntráð," segir Þórarinn, en myntráð merkir að erlend mynt stendur á bak við alla peninga í umferð. Hann segir að „mjúk" fastgengisstefna, þar sem seðlabankinn ákveður einhliða að binda gengið öðrum gjaldmiðli, skapi ekki sama ávinning.

Í rannsókninni er ekki tekin afstaða til þess gagnvart hvaða gjaldmiðli væri heppilegast að festa gengið, þó verið sé að rannsaka það í seðlabankanum. Persónuleg skoðun Þórarins er þó sú að evran henti best.

„Ég hef svo sem áður komið fram og sagt að meginrökin hnígi að því að þetta sé stór gjaldmiðill. Ávinningurinn af því að taka upp aðra mynt er því meiri eftir því sem gjaldmiðillinn er stærri. Hann er líka meiri eftir því sem viðskipti okkar við myntsvæðið eru meiri. Þá hníga þessi efnahagslegu rök að því að sá gjaldmiðill sé evran. Við útilokum í rauninni ekkert annað og erum nú að framkvæma rannsókn þar sem við reynum að svara þessum spurningum."

Aðrir gjaldmiðlar hafa þó verið nefndir til sögunnar, en álitsgjafar hafa nefnt bæði Bandaríkjadal og Kanadadal sem hugsanlega akkerisgjaldmiðla gagnvart Íslandi. Þórarinn segir þó að þeir henti verr en evran út frá rökum um að viðskipti okkar við viðkomandi myntsvæði séu sem mest til að hámarka ávinninginn af fastgengisstefnunni.

„Viðskiptin við evrusvæðið eru um helmingurinn af okkar utanríkisviðskiptum. Bandaríkin eru rúmlega tíu prósent og Kanada innan við eitt prósent, ef ég man rétt. Út frá þessum rökum hentar evran klárlega betur en hinir tveir."