Svíar vilja framlengja gjaldmiðlaskiptasamingi við Ísland

Ríkisstjórn Svíþjóðar hefur lagt tillögu fyrir sænska þingið um að gjaldmiðlaskiptasamningur sá sem gerður var við Ísland vorið 2009 verði framlengdur til ársloka í ár.

Samningur þessi var hluti af aðstoð Norðurlandanna við Ísland í kreppunni. Svíþjóð, Noregur og Danmörk samþykktu að veita Íslandi hvert um sig gjaldmiðlaskiptasamning upp á 500 milljónir evra eða samtals 1,5 milljarða evra. Þessir samningar eru fyrir utan þá fjárhagsaðstoð sem Norðurlöndin veita Íslandi í tengslum við áætlun Alþjóðagjaldeyrissjóðsins en sú aðstoð nemur tæpum 1,8 milljörðum evra.

Það er athyglisvert að í þingskjali sem fjármálaráðherra Svía leggur fram með tillögunni um að framlengja gjaldmiðlaskiptasamninginn kemur fram að hingað til hafa Svíar aðeins heimilað notkun á helmingnum af þessum 500 milljónum evra. Gerir tillagan ráð fyrir að virkja samninginn að fullu núna en 500 milljónir evra samsvara tæpum 83 milljörðum króna.

Þá er að finna í þingskjalinu ítrekun á þeirri skoðun Svía að Íslendingar eigi að standa við skuldbindingar sínar, það er greiða Icesaveskuldina.