Sárt tap á heimavelli hjá Löwen

Rhein-Neckar Löwen er í slæmri stöðu í fjórðungsúrslitum Meistaradeildar Evrópu eftir tap á heimavelli fyrir Montpellier í dag, 29-27.

Þetta var fyrri leikur liðanna í fjórðungsúrslitunum en síðari leikur liðanna fer fram í Frakklandi um næstu helgi.

Leikurinn var jafn fyrstu mínúturnar en í stöðunni 8-6 fyrir Montpellier skoraði Löwen fimm mörk í röð og tók völdin í leiknum. Staðan í hálfleik var 12-9, Löwen í vil.

Lærisveinar Guðmundar Guðmundssonar héldu uppteknum hætti í upphafi síðari hálfleiks og skoraði Róbert Gunnarsson snemma tvö mörk í röð og kom sínum mönnum í 16-11 forystu.

Þá komu fjögur mörk í röð frá Montpellier sem náði svo fljótlega yfirhöndinni í leiknum. Forysta þeirra frönsku var mest fjögur mörk en Löwen skoraði síðustu tvö mörk leiksins og náði að laga stöðuna aðeins.

Leikmenn Löwen spiluðu illa í síðari hálfleik og misstu öll tök á leiknum. Markvarslan var lítil sem engin og sóknarleikurinn slakur.

Róbert og Ólafur Stefánsson spiluðu mikið fyrir Löwen í dag en Guðjón Valur Sigurðsson kom ekkert við sögu. Róbert skoraði þrjú mörk en Ólafur ekkert þó svo að hann hafi lagt upp mörg mörk fyrir félaga sína.