Framtakssjóður skilaði 700 milljóna hagnaði í fyrra

Framtakssjóður Íslands skilaði 700 milljónum króna í hagnað á árinu 2010. Heildareignir sjóðsins í árslok námu um 5,6 milljörðum króna.

Þetta kemur fram á vefsíðu sjóðsins. Þar segir að árið í fyrra hafi verið fyrsta eiginlega starfsár Framtakssjóðs Íslands og hagnaður af starfseminni hafi numið 700 milljónum króna. Heildareignir við árslok námu um 5,6 milljörðum króna og eigið fé í lok árs var 4,9 milljarðar króna:

Við áramót var hlutur sjóðsins í Icelandair Group eina hlutabréfaeign félagsins. Í janúar 2011 samþykkti Samkeppniseftirlitið kaup Framtakssjóðsins á Vestia og bættust þá Icelandic Group, Skýrr, Vodafone, Húsasmiðjan og Plastprent í eignasafn Framtakssjóðsins.

Með þeirri viðbót nemur samanlögð velta fyrirtækja í eignasafni sjóðsins nú um 300 milljörðum króna og hjá þeim starfa um 8 þúsund starfsmenn, um helmingur þeirra á Íslandi.

„Það er afar ánægjulegt að sjá afkomuna á þessu fyrsta starfsári sjóðsins en hún skýrist af þeim árangri sem náðist í rekstri Icelandair á seinasta ári. Starfsemi Framtakssjóðsins á árinu mótaðist að verulegu leyti af uppbyggingu eignasafnsins en 5 fyrirtæki bættust í eignasafn sjóðsins nú í janúar 2011. Verkefnin framundan eru að halda áfram að byggja upp eignasafnið, vinna að sölu á þeim eignum sem búið er að tilkynna að fari í söluferli og þróa önnur fyrirtæki í eigu sjóðsins áfram," segir Finnbogi Jónsson, framkvæmdastjóri Framtakssjóðs Íslands.