Verðbólgan í mars mælist 2,3%

Síðastliðna tólf mánuði hafa vísitala neysluverðs og vísitalan án húsnæðis hækkað jafnmikið eða um 2,3%.  Verðbólgan í mars mælist sem sagt 2,3% en hún var 1,9% í febrúar.

Þetta kemur fram á vefsíðu Hagstofunnar. Þar segir að undanfarna þrjá mánuði hefur vísitala neysluverðs hækkað um 1,2% sem jafngildir 5,0% verðbólgu á ári (5,1% verðbólgu fyrir vísitöluna án húsnæðis).

Vísitala neysluverðs miðuð við verðlag í mars er 371,2 stig og hækkaði um 0,95% frá fyrra mánuði. Vísitala neysluverðs án húsnæðis er 353,9 stig og hækkaði um 1,09% frá febrúar.

Verð á bensíni og olíum hækkaði um 6,9% (vísitöluáhrif 0,41%) og verð á fötum og skóm um 3,7% (0,23%). Kostnaður vegna eigin húsnæðis jókst um 0,8% (0,10%), aðallega vegna hærra markaðsverðs.

Vísitala neysluverðs samkvæmt útreikningi í mars 2011, sem er 371,2 stig, gildir til verðtryggingar í maí 2011. Vísitala fyrir eldri fjárskuldbindingar, sem breytast eftir lánskjaravísitölu, er 7.329 stig fyrir maí 2011.