Reykjanesbær nær samningum um lán

Reykjanesbær hefur náð samningum við Depfabankann á Írlandi um framlengingu á 1,8 milljarða króna láni sem gjaldféll í ágúst í fyrra. Bankinn hafnaði í fyrstu samningum og erfitt var að leita samninga vegna efnahagskreppunnar og erfiðleika bankans sjálfs sem var í slitameðferð, eftir því sem fram kemur í tilkynningu frá Reykjanesbæ. Með samningi sem bæjarráð samþykkti í morgun er lánið framlengt um tvö ár.

„Bankinn hefur gefið sér tíma til að fara yfir stöðu bæjarfélagsins og samþykkir þessa samninga í framhaldi af því. Þetta gefur okkur svigrúm til að losa m.a. um skuldabréf sem bærinn á sem nú er að stofnvirði um 8,2 milljarðar kr." segir Árni Sigfússon bæjarstjóri í fréttatilkynningu.