FME sektar MP banka um 15 milljónir

Fjármálaeftirlitið (FME) hefur lagt 15 milljóna kr. stjórnvaldssekt á EA fjárfestingarfélag hf., áður MP banka. Sektin er tilkomin vegna þess vegna þess að áhættuskuldbindingar fóru langt fram úr leyfilegum mörkum eða rúmlega 126% af eiginfjárgrunni. Leyfileg mörk eru 25%.

Fjallað er um málið á vefsíðu FME. Þar segir að í desember 2009 framkvæmdi Fjármálaeftirlitið vettvangskönnun hjá MP banka hf. Í kjölfar hennar fór fram ítarleg greiningarvinna á m.a. fjárhagslega tengdum aðilum og takmörkunum á stórum áhættum. Niðurstaða Fjármálaeftirlitsins var sú að til staðar hefði verið áhættuskuldbinding sem næmi 126,34% af eiginfjárgrunni MP banka þegar leyfilegt hlutfall er 25%.

Í skýrslu Fjármálaeftirlitsins, dags. 14. apríl 2010, sem unnin var í framhaldi af framangreindri vettvangskönnun, var niðurstaða stofnunarinnar rakin og rökstudd í ítarlegu máli. Á fyrri stigum hafði MP banka verið veittur andmælaréttur við drögum að skýrslunni sem bankinn nýtti.

Fjármálaeftirlitið taldi hins vegar ekki tilefni til að hnika frá afstöðu sinni varðandi túlkun laga og reglna um stórar áhættur og komst eftirlitið því að þeirri niðurstöðu að MP banki hefði gerst brotlegur við þágildandi lög. MP banki fékk í kjölfarið frest til að gera nauðsynlegar úrbætur svo koma mætti áhættuskuldbindingu félagsins niður fyrir lögmæt mörk.

Stjórn Fjármálaeftirlitsins tók ákvörðun, þann 8. apríl 2011, um álagningu stjórnvaldssektar vegna brotsins að fjárhæð 30 milljónir króna. EA fjárfestingarfélag hf. fór fram á endurupptöku ákvörðunarinnar með bréfi dags. 20. maí 2011. Félagið byggði á tveimur greinum stjórnsýslulaga og krafðist þess aðallega að sektin yrði felld niður en til vara að hún yrði lækkuð verulega.

Eins og mál þetta er vaxið, þ.á m. vegna skjótra viðbragða við kröfu um úrbætur og gagngerðrar endurskipulagningar á starfsemi bankans með þátttöku nýrra aðila hefur Fjármálaeftirlitið ákveðið að ljúka málinu með stjórnvaldssekt í stað þess að vísa því til lögreglunnar.

Við ákvörðun sektarfjárhæðar er tekið tillit til þess að við skuldbindingum MP banka hefur tekið EA fjárfestingarfélag hf. sem starfar ekki sem fjármálafyrirtæki en hefur að megin tilgangi að gera upp við kröfuhafa bankans og hefur ekki að öðru leyti umsvif á fjármálamarkaði. Jafnframt er tekið tillit til fjárhagsstöðu félagsins. Þykir sektin því hæfilega ákveðin 15 milljónir króna.

Þess skal getið að EA fjárfestingarfélag hf. hefur höfðað mál gegn Fjármálaeftirlitinu fyrir Héraðsdómi Reykjavíkur og krafist ógildingar sektarákvörðunarinnar.