Segir lántöku fyrir arði eðlilega

Stefán Már Stefánsson, lagaprófessor og sérfræðingur í félagarétti við Háskóla Íslands, segir að lántaka til að greiða út arð til hluthafa sé í ákveðnum tilfellum eðlileg. Hann segist hins vegar ekki vita um nein dæmi um slíkt hér á landi þótt slíkt sé vel þekkt erlendis.

Eins og fréttastofa greindi frá í gærkvöldi tók Fons, eignarhaldsfélag Pálma Haraldssonar og Jóhannesar Kristinssonar, 4,2 milljarða króna lán hjá Landsbanka Íslands í september 2007 til að greiða út arð vegna góðs hagnaðar rekstrarárið 2006. Með öðrum orðum var ekki til handbært laust fé til að greiða arðinn út og því sló félagið lán til að greiða hluthöfum sínum, þeim Pálma og Jóhannesi inn á reikning félags þeirra Matthews Holding í Lúxemborg.

Stefán Már Stefánsson, lagaprófessor við HÍ, segir að í ákveðnum tilvikum sé ekkert óeðlilegt við slíka lántöku sé hún samræmi við lög um hlutafélög og hafi hún verið samþykkt af hluthafafundi.

Stefán segir að mikilvægt að arðurinn sé greiddur út á jafnréttisgrundvelli og í samræmi við fyrirmæli laga um hlutafélög. „Aðalatriðið er að þetta séu fjármunir sem safnast hafa saman vegna rekstrarafgangs fyrri ára. [... ] Það má ekki slá því föstu semsagt að lántaka í þessu skyni sé í sjálfu sér ólögmæt."

„Ég þekki ekki beint dæmi hér á landi um þetta en erlendis þekkist þetta alveg. Og ég tel alveg víst að þetta hafi verið gert hérna, þó ég þekki það ekki sjálfur," segir Stefán Már Stefánsson, prófessor við lagadeild HÍ.