Tóku lán fyrir arðgreiðslunni

Rúmlega fjögurra milljarða króna arðgreiðsla sem Pálmi Haraldsson greiddi sér útúr fjárfestingarfélaginu Fons vegna góðs hagnaðar rekstrarárið 2006 var fengin að láni hjá Landsbankanum.

Í ársreikningi Fons fyrir rekstrarárið 2007 kemur fram arðgreiðsla til hluthafa upp á 4,4 milljarða króna sem greidd er til félagsins Matthews Holding í Lúxemborg. Félagið var í eigu Pálma Haraldssonar og Jóhannesar Kristinssonar, viðskiptafélaga Pálma sem er nokkurs konar huldumaður í íslensku viðskiptalífi.

Fons er nú gjaldþrota með kröfur upp á rúmlega fjörutíu milljarða. Stærstu kröfurnar eru frá Glitni. Eins og fréttastofa hefur greint frá hefur Óskar Sigurðsson, lögmaður og skiptastjóri þrotabús Fons, tekið þá ákvörðun að láta reyna á riftun umræddrar arðgreiðslu. Pálmi Haraldsson hefur sjálfur sagt öll skilyrði arðgreiðslunnar hafi verið hendi samkvæmt hlutafélagalögum þegar ákvörðun um hana var tekin.

Í september 2007 átti Fons von á hárri arðgreiðslu frá Iceland-keðjunni sem félagið átti hlut í. Svo virðist sem legið hafi á að greiða út arð til eigenda Fons vegna rekstrarársins 2006 því félagið fékk lán hjá Landsbankanum upp á 4,2 milljarða króna til að greiða arðinn út. Var lánið afgreitt hjá fyrirtækjasviði Landsbanka Íslands inn á reikning Matthews Holding hjá Kaupþingi í Lúxemborg í september 2007, en um var að ræða sérstaka lánalínu sem Fons hafði hjá bankanum sem dregið var á í umrætt skipti.

Skiptastjóri þrotabúsins telur arðgreiðsluna andstæða góðri rekstrarvenju í skilningi 2. mgr. 99.gr. Og á grundvelli 95. gr. sömu laga en þar segir að hlutahafafundur megi ekki taka ákvörðun sem bersýnilega sé til þess fallin að afla ákveðnum hluthöfum ótilhlýðilegra hagsmuna á kostnað félagsins.

Pálmi Haraldsson áréttar að von hafi verið á arðgreiðslu frá Iceland í september 2007 þegar lánið frá Landsbankanum tekið. Að sögn Óskars Sigurðssonar hafa 75 prósent af kröfum Landsbankans verið greiddar, en útistandandi eru rúmlega tveir milljarðar króna.

Pálmi Haraldsson vill koma því á framfæri að lán vegna arðgreiðslunnar hafi verið greitt um leið og arðurinn frá Iceland barst.