Framleiðsluverðmæti Fjarðaáls 100 milljarðar á ári

Framleiðsluverðmæti Fjarðaáls austur á fjörðum nemur nú hátt í 100 milljörðum kr. á ári. Í fyrra framleiddi álverið rétt tæp 350.000 tonn af áli. Miðað við núverandi álverð á málmmarkaðinum í London er verðmæti þeirrar framleiðslu vel yfir 100 milljörðum.

Heimsmarkaðsverð á áli stendur nú í 2.257 dollurum á tonnið m.v. þriggja mánaða framvirka samninga. Langtímaspár sérfræðinga á Bloomberg fréttaveitunni gera ráð fyrir að álverðið í ár verði að meðtali nokkuð yfir 2.000 dollurum á tonnið. Miðað við að álframleiðsla Fjarðaáls verði ekki minni á þessu ári en því síðasta verður framleiðsluverðmætið í ár aldrei undir ríflega 700 milljónum dollara eða um 90 milljörðum kr. og sennilega meira.

Tómas Már Sigurðsson forstjóri Fjarðaáls, sem er dótturfélag bandaríska álrisans Alcoa, fjallar um árið í fyrra á vefsíðu álversins. Þar segir hann að árið 2009 var viðburðarríkt hjá Fjarðaáli.

„Það hófst með látum, ekki bara á Austurvelli, heldur líka á mörkuðum og verð á áli var í frjálsu falli fyrstu mánuði ársins. En við brugðumst við af kappi og gerðum allt sem við gátum til að spyrna við. Miklu sparnaðarátaki var ýtt úr vör, hagræðing varð í hráefniskaupum og fjöldi annara tækifæra var nýttur. Það er ykkar hugviti og krafti að þakka að við náðum að bæta hina ýmsu þætti rekstrarins stórkostlega og þess vegna getum við sagt í dag að við séum að skila af okkur afar ásættanlegri niðurstöðu fyrir árið 2009," segir Tómas Már.

„Framleiðslan var vel umfram væntingar og við fluttum út 349.433 tonn, nákvæmlega. Flest ef ekki öll framleiðslumarkmið náðust og í dag er ekkert álver í heiminum sem daglega framleiðir jafn mörg tonn í hverju keri og Fjarðaál. Og þegar árangurinn er skoðaður í hverju ferli fyrir sig kemur fljótlega í ljós að framfarir eru rauði þráðurinn hvert sem litið er. Við getum því verið afar stolt af árangri okkar á síðasta ári."

Tómas Már fjallar m.a. um álver á Bakka í erindi sínu til starfsmanna. Þar segir: „Hvað Bakka varðar þá trúi ég enn að þar sé frábært tækifæri fyrir okkur til að auka starfsemi okkar á Íslandi. Við höfum unnið að því verkefni af fullum hug allt frá árinu 2006. Í október sl. tilkynnti iðnaðarráðherra okkur hins vegar að ríkisstjórnin myndi ekki framlengja viljayfirlýsingu við okkur um áframhaldandi vinnu við verkið. Það er því ekki vilji stjórnvalda að Alcoa byggi álver á Bakka.