Icelandair leikur stórt hlutverk í kynningarherferð

Icelandair leikur stórt hlutverk í umfangsmikilli kynningarherferð sem ferðamálaráð Danmerkur, Noregs og Svíþjóðar standa sameiginlega að í Bandaríkjunum um þessar mundir. Ferðamálastofurnar þrjár, sem heita VisitDenmark, Innovation Norway og VisitSweden hafa tekið höndum saman og kynna löndin þrjú sameiginlega sem áfangastaða ferðamanna með beinum auglýsingum á götum úti og á vefnum.

Í tilkynningu segir að frá því í lok september hafa verið birtar auglýsingaherferðir utanhúss, t.d. á strætóskýlum og vegaskiltum í þremur borgum, New York, Boston og Seattle.

Í síðustu viku hófst síðan herferð á vefnum með þátttöku margra af þekktustu einstaklingum frá Norðurlöndunum þremur í Bandaríkjunum. Norski hiphop dúettin Madcon, stjörnuleikmaðurinn í ameríska fótboltanum, Morten Anderson frá Danmörku og sænska hokkístjarnan Henrik Lundqvist og margir fleiri segja þar frá uppáhaldsstöðum sínum heima fyrir.

"Icelandair er kallað til þessa samstarfs m.a. vegna þekkingar okkar og reynslu á bandarískum ferðamarkaði og vegna þess að enginn býður upp á jafn mikið flug og góðar tengingar milli Bandaríkjanna og þessara þriggja landa og við. Á næsta ári er Icelandair að bjóða áætlunarflug til fjögurra borga í Noregi, Osló, Bergen, Þrándheims og Stavanger, til tveggja borga í Danmörku, þ.e. Billund og Kaupmannahafnar og til Stokkhólms og Gautaborgar í Svíþjóð. Til þessara átta borga erum við að fljúga frá sex borgum í Bandaríkjunum, þ.e. New York, Boston, Seattle, Minneapolis, Orlando og Washington. Þetta er spennandi samstarf og lærdómsríkt fyrir okkur", segir Birkir Hólm Guðnason, framkvæmdastjóri Icelandair.

"Þessi herferð dregur athygli að Icelandair og þeirri þjónustu sem við bjóðum og styrkir farsælt samstarf okkar við ferðamálaráðin á Norðurlöndum", segir Birkir.

"Viðbrögðin hafa verið mjög góð og mikill áhugi á áframhaldandi samstarfi á þessum grunni. Í allri kynningu er tekið fram að á leiðinni yfir Atlantshafið stendur farþegum til boða að hafa viðdvöl á Íslandi án endurgjalds og við gerum ráð fyrir að fjölmargir nýti sér það".